༈ རྒྱལ་བའི་བསྟན་པ་ལ་དད་པ་དང་ཐོས་པའི་སྟོབས་དགེ་བ་མདོ་སྨད་པ་དགེ་བསྙེན་འཇིགས་མེད་བློ་གྲོས། ༧གོང་ས་སྐྱབས་མགོན་ཆེན་པོ་མཆོག་གི་གསུངས། ཕྱི་ལོ་ ༢༠༠༢ ཟླ་ ༤ ཚེས་ ༢༧ ལ། ༈ མདོ་སྨད་པ་འཇིགས་མེད་བློ་གྲོས་ལགས་ནི། རང་རེའི་སྤྱི་ཚོགས་ནང་བོད་ཀྱི་ཆོས་རིག་ལ་དོ་སྣང་ཆེན་པོས་རླབས་ཆེན་གྱི་དགོངས་པ་བཞེས་མཁན་ཞིག་དང༌། ད་བར་སྒེར་གྱི་འཚོ་གོས་ལ་མ་ལྟོས་པར་རྩོམ་རིག་སྣེ་མང་གནང་བའི་ཉམས་མྱོང་དང་ཐུགས་རྒྱུས་མངའ་བ་ཞིག་ཡིན། བོད་གཞུང་ཆོས་དོན་ལས་ཁུངས། ཕྱི་ལོ་ ༢༠༠༢ ཟླ་ ༦ ཚེས་ ༡༤ ལ།

གསལ་བཤད།

སློབ་དཔོན་སྣ་ཚོགས་གཟུགས་ཅན།
བཀུར་འོས་པའི་དྲ་གྲོགས་རྣམ་པ། ཕྲན་སྒེར་གྱི་དྲ་ཚིགས་འདི་ནི། ཁོ་བོས་སུག་བྲིས་བྱས་པའི་རྩོམ་སྔ་ཕྱི་ཐམས་ཅད་ཁྱེད་ཅག་གི་སྤྱན་ལམ་དུ་གཟིགས་འབུལ་ཞུ་སའི་ལྟེ་བ་ལྟ་བུ་ཞིག་ཡིན། གཞུང་འགྲེལ་སོགས་ཅུང་རིང་བའི་རྩོམ་རྣམས་གནས་སྐབས་སུ་འདིར་མ་ཤོང་ཡང་རིམ་གྱིས་ཡར་རྒྱས་ལ་གཏོང་རྒྱུ་ཡིན། ཁོ་བོའི་རང་མིང་དངོས་ལ་འཇིགས་མེད་བློ་གྲོས་རྒྱལ་མཚན་དང་། མཁན་ཆེན་ཕྲིན་ལས་དབང་རྒྱལ་གྱིས་གནང་བའི་མིང་དཀོན་མཆོག་གསུམ་གྱི་འོད་ཟེར། གྲུབ་དབང་པདྨ་གཏུམ་དྲག་རོལ་བའི་རྡོ་རྗེས་གནང་བའི་མིང་འཇམ་དཔལ་ཡེ་ཤེས། གཏེར་སྟོན་བསམ་གཏན་རབ་རྒྱས་ཀྱིས་གནང་བའི་མིང་ཟླ་བྲལ་ཤེས་རབ་བདེ་སྟོང་རིག་པའི་རྡོ་རྗེ། རིགས་ལྔའི་མཁའ་འགྲོའི་ལུང་བྱང་ལས་བྱུང་བ་ཨོ་རྒྱན་སྒྲིབ་བྲལ་གླིང་པ། དག་སྣང་གསང་བའི་ཆོས་མཛོད་ལས་བྱུང་བའི་མིང་སློབ་དཔོན་སྣ་ཚོགས་གཟུགས་ཅན། ཡི་དམ་ལྷས་ལུང་བསྟན་པའི་མིང་སློབ་དཔོན་རྒྱ་མཚོའི་སྤྲིན་གྱི་ལང་ཚོ། ཀུན་བཤད་ཀྱི་མིང་མཚུངས་མེད་ངག་རིག་རང་གྲོལ་མཚོ་བྱུང་འཛུམ་པའི་སྣང་བ་བཅས་ཕྲན་ལ་མིང་མི་འདྲ་བ་འགའ་ཞིག་ཡོད་པས། རྩོམ་མི་འདྲ་རྣམས་ཀྱི་མཇུག་ཏུ་དགོས་པའི་དབང་གིས་མིང་གང་ཞིག་དང་སྐབས་སུ་འཚམས་པ་བེད་སྤྱོད་བྱས་ཡོད་ཅིང་། མིང་བྲིས་མེད་ས་འགའ་རེ་ཡོད་པ་རྣམས་ཀྱང་དྲ་རྒྱ་འདིར་ཡོད་ཕྱིན་ཁོ་བོ་རང་གིས་སུག་བྲིས་འབའ་ཞིག་ཡིན། དྲ་རྒྱ་འདིར་བཅུག་མེད་པའི་རྩོམ་གཞན་ཕྲན་དང་མིང་གཅིག་པ་ཅན་འགའ་རེ་མཐོང་བ་རྣམས་ནི་ཁོ་བོ་དང་འབྲེལ་བ་ཅི་ཡང་མེད་པ་མཁྱེན་དགོས་སོ།། ཐུགས་རྗེ་ཆེ།
View my complete profile

དྲ་ངོས་བཀླགས་གྲངས


ཟིན་བྲིས་འདི་གཟིགས་པར་ངེས་པར་དུ་ཧི་མ་ལ་ཡའི་ཡིག་གཟུགས་དང་། དྲ་འབྱེད་གཉེན་ཆས IE7 གཉིས་་ཕབ་ལེན་བྱེད་དགོས།
Powered by Blogger.
2014/05/15


༄༅༅༎     སློབ་དཔོན་ཆེན་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་གནས་མོན་གྱི་སྤ་གྲོ་སྟག་ཚང་གི་གཏམ་རིག་འཛིན་གྲུབ་པའི་ལམ་ཡིག་ཅེས་བྱ་བ། 
(སྐུ་པར་རྣམས་གནས་ཡིག་གི་གཤམ་དུ་ཡོད།) 
སློབ་དཔོན་སྣ་ཚོགས་གཟུགས་ཅན་གྱིས་བརྩམས།
    བླ་མ་པདྨ་འབྱུང་གནས་ལ་ཕྱག་འཚལ་ལོ༎    ཡི་དམ་སྒྲུབ་པ་བཀའ་བརྒྱད་ལ་ཕྱག་འཚལ་ལོ༎     མཁའ་འགྲོ་ཡེ་ཤེས་མཚོ་རྒྱལ་ལ་ཕྱག་འཚལ་ལོ༎    མོན་མོ་བཀྲ་ཤིས་ཁྱེའུ་འདྲེན་ལ་ཕྱག་འཚལ་ལོ༎    དེ་ཡང་སློབ་དཔོན་སྣ་ཚོགས་གཟུགས་ཅན་ཞེས་བྱ་བ།    རང་བཞིན་གྱིས་བློ་གྲོས་གསལ་ཞིང་སྐྱེ་མཆེད་དྭངས་པ།    རང་བྱུང་པདྨ་རྒྱལ་པོའི་བཀའ་གཏེར་གྱི་ཆོས་སྒོ་རབ་འབྱམས་ལ་ཐོས་བསམ་སྒོམ་པའི་སྐལ་བ་སྦོམ་པོར་གྱུར་པ་བདག     རང་ལོ་བཅུ་བདུན་བཅོ་བརྒྱད་ཡས་མས་ཀྱི་དུས་སུ།    མཁས་གྲུབ་བྱེ་བའི་གཙུག་རྒྱན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་མཆོག་གིས་མཛད་པའི་སྔ་འགྱུར་ཆོས་འབྱུང་ལྷ་དབང་གཡུལ་ལས་རྒྱལ་བའི་དགའ་སྟོན་ལག་ཏུ་རྙེད་ཅིང་།     དེའི་ནང་ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་བས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་ཆེན་ཐུན་མོང་མ་ཡིན་པ།    སྐུའི་གནས་ཆེན་སྒྲགས་ཀྱི་ཡང་རྫོང་།    གསུང་གི་གནས་མཆོག་བསམ་ཡས་མཆིམས་ཕུ་བྲག་དམར་ཀེའུ་ཚང་།    ཐུགས་ཀྱི་གནས་ཆེན་ལྷོ་བྲག་མཁར་ཆུ་དཔལ་གྱི་ཕུག་རིང་།    ཡོན་ཏན་གྱི་གནས་ཆེན་ཡར་ལུང་ཤེལ་གྱི་བྲག་ཕུག    ཕྲིན་ལས་ཀྱི་གནས་ཆེན་མོན་ཁ་ནེ་རིང་སེང་གེ་རྫོང་།    སློབ་དཔོན་ཆེན་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་གནས་མོན་གྱི་སྤ་གྲོ་སྟག་ཚང་བཅས་ཀྱི་པར་རིས་བཞུགས་པ་མཐོང་བའི་རྐྱེན་བྱས།    རང་གི་ཚེ་འདིའི་ཕ་རྒན་དངོས་ཀྱི་འདུ་ཤེས་བཅོས་མ་མ་ཡིན་པ་ལྷན་སྐྱེས་སུ་མངའ་བའི་སློབ་དཔོན་སངས་རྒྱས་གཉིས་པ་རྗེས་སུ་དྲན་ཏེ་མཆི་མ་པང་ཁར་ལྷུང་ཡང་།    ལང་ཚོ་ཤེད་མ་ཕྱེས་པས་འཕྲལ་དུ་ལམ་ལ་ཆས་པའི་ནུས་པ་ནི་མེད།     ཕྱིས་ཤིག་ན་གནས་ཆེན་དེ་དག་ཏུ་ཅིས་ཀྱང་འགྲོ་ངེས་པའི་དམ་བཅའ་སྙིང་ལ་བཞག་པ་བཞིན་དཔལ་གྱི་བསམ་ཡས་མཆིམས་ཕུ་སོགས་སུ་དངོས་སུ་སླེབས་པའི་སྐལ་བཟང་སྔ་མོ་ཞིག་ནས་བྱུང་ཡང་།      འབྲུག་གི་རྒྱལ་ཁོངས་སུ་ཡོད་པའི་སེང་གེ་རྫོང་དང་།     སྤ་གྲོ་སྟག་ཚང་སོགས་ལ་འགྲོ་ཐབས་མ་ཐོན་པར་རིང་ཞིག་ལུས།    རྒྱ་གར་དུ་སྡོད་པའི་རིང་འབྲུག་ཏུ་གནས་སྐོར་ལ་འགྲོ་བའི་གྲབས་ཤོམ་ཡང་ཡང་བྱས་ཀྱང་དཔལ་འབྱོར་གྱི་མཐུན་རྐྱེན་མ་འཛོམས་པས་འགྲོ་ཐབས་མ་བྱུང་།     ཉེ་བའི་ལོ་ཤས་ཀྱི་ནང་།    ལས་དང་སྨོན་ལམ་གྱིས་དམ་ཚིག་གཅིག་ཏུ་སྦྲེལ་བའི་མོན་བཟའ་ཚེ་དབང་རིག་འཛིན་ཆོས་སྐྱིད་དབང་མོ་མཆོག་གིས་ཐུགས་བརྩེ་ཆེན་པོས་རྗེས་སུ་བཟུང་ཞིང་།   མགོ་འདོན་བརྩེ་སྐྱོང་གི་བཀའ་དྲིན་ཚད་མེད་གནང་བ་ལྟར་འབྲུག་ལ་ཡང་ཡང་བསྐྱོད་པའི་གོ་སྐབས་བྱུང་བ་དང་།    གནས་མཆོག་འདིར་ཡང་ཐེངས་གཉིས་སུ་ཕྱིན་ཏེ་དོན་བརྒྱུད་ཀྱི་རྟོགས་པ་སྙིང་ལ་འཕོ་བའི་རྟེན་འབྲེལ་ལེགས་ཕྱོགས་སུ་འགྲིག་པ་བྱུང་ངོ་།།  

དེ་ལྟར་སྔ་ཕྱི་ཐེངས་གཉིས་སུ་གནས་འདིར་སླེབས་པའི་རིང་སྟག་ཚང་གི་གནས་ཡིག་ཅིག་ཡོད་མེད་ལ་ནུས་ཤུགས་ཡོད་དགུས་འབད་པ་བྱས་ཀྱང་།   འགའ་རེས་སྔ་མོ་ཞིག་ལ་ཅིག་འདུག་སྟེ་ད་ལྟ་རྫོགས་ཚར་སོང་ཟེར་བ་དང་།   ཡང་འགའ་རེས་དབྱིན་ཡིག་གི་ཐོག་ན་ངོ་སྤྲོད་མདོ་ཙམ་རེ་ཡོད་པ་ལས་རྫོང་ཁའི་ཐོག་ལ་ཡོད་པ་ད་བར་མཐོང་མ་སོང་སོགས་ཟེར་ཞིང་།   ཐིམ་ཕུག་གི་དཔེ་མཛོད་ཁང་དང་།  དཔེ་ཚོང་ཁང་།     དེ་བཞིན་གྷོ་གྷལ་དྲ་ལམ་སོགས་ནས་ཀྱང་ཇི་ལྟར་བཙལ་ཀྱང་ངོ་སྤྲོད་མདོར་བསྡུས་ཙམ་རེ་ལས་འདོད་པ་ཁེངས་པ་ཞིག་ད་བར་མ་རྙེད་པས།     ལོ་སྔ་ཕྱི་གཉིས་ཀྱི་རིང་གི་ཟིན་ཐོ་དང་།      མཁས་གྲུབ་དམ་པ་དུ་མའི་གསུང་དཔང་པོར་བཞག་སྟེ།     མ་འོངས་པའི་གནས་སྐོར་བ་རྣམས་ལ་སྤྲོ་བ་བསྐྱེད་པའི་ཕྱིར།    གནས་མཆོག་འདི་ཉིད་ཀྱི་ལོ་རྒྱུས་དང་བྱིན་རླབས་ཀྱི་ཆེ་བ་སོགས་མཛུབ་མོས་རི་སྟོན་ཙམ་ཞིག་བྱ་བའི་ལས་ལ་འཇུག་པར་བྱའོ༎
དེ་ཡང་ལུང་ཕྲན་ཚེགས་ལས།   དགེ་སློང་དག   ང་འདས་པའི་འོག་ཏུ་གནས་བཞི་པོ་འདི་དག་ནི་རིགས་ཀྱི་བུ་དང་བུ་མོ་དད་པ་ཅན་རྣམས་ཀྱིས་ཇི་སྲིད་འཚོ་བའི་བར་དུ་འགྲོ་བར་བྱ་ཞིང་དྲན་པར་འགྱུར་བར་བྱའོ།།    བཞི་གང་ཞེ་ན།    འདིར་ནི་བཅོམ་ལྡན་འདས་འཁྲུངས་སོ།།   འདིར་ནི་བཅོམ་ལྡན་འདས་མངོན་པར་རྫོགས་པར་སངས་རྒྱས་སོ།།   འདིར་ནི་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རྣམ་པ་བཅུ་གཉིས་སུ་བསྐོར་རོ།།    འདིར་ནི་བཅོམ་ལྡན་འདས་ཡོངས་སུ་མྱ་ངན་ལས་འདས་པ་སྟེ།   དགེ་སློང་དག་ང་འདས་པའི་འོག་ཏུ་འདིར་མཆོད་རྟེན་བསྐོར་བ་དང༌།    མཆོད་རྟེན་ལ་ཕྱག་འཚལ་བ་དག་འོང་གི   དེ་དག་ལ་འདི་སྐད་ཅེས་བརྗོད་པར་བྱ་སྟེ་ཞེས་སོགས་གསུངས་པ་དང་རྗེས་སུ་མཐུན་པར།     སློབ་དཔོན་ཐུགས་རྗེ་ཅན་གྱི་རྗེས་སུ་ཞུགས་པ་དག་གིས་ཀྱང་།    རྩོད་མེད་ཡོངས་གྲགས་ཀྱིས་གསལ་པོར་ངོས་ཟིན་པའི་གུ་རུའི་གནས་ཆེན་རྣམས་ལ།    འདིར་ནི་སློབ་དཔོན་ཆེན་པོ་པདྨ་འབྱུང་གནས་ཀྱིས་འཆི་མེད་ཚེ་ཡི་རིག་འཛིན་བརྙེས་སོ༎    འདིར་ནི་སློབ་དཔོན་ཆེན་པོས་དཔལ་ཡང་དག་གི་གྲུབ་པ་བརྙེས་སོ༎     འདིར་ནི་སློབ་དཔོན་ཆེན་པོས་ལྷ་འདྲེ་དམ་ལ་བཞག་ཅིང་སངས་རྒྱས་ཀྱི་བསྟན་པ་རྒྱ་ཆེར་བཙུགས་སོ༎    འདིར་ནི་སློབ་དཔོན་ཆེན་པོས་ལས་ཅན་སྙིང་གི་བུ་དགུ་ལ་དཔལ་སྒྲུབ་པ་ཆེན་པོ་བཀའ་བརྒྱད་ཀྱི་དཀྱིལ་འཁོར་གྱི་ཞལ་ཕྱེས་ཏེ་དབང་བསྐུར་རོ༎    འདིར་ནི་སློབ་དཔོན་ཆེན་པོས་ལྷ་སྲས་མུ་ཏིག་བཙད་པོ་སོགས་རྗེ་འབངས་འདུས་པའི་འཁོར་ལ་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཀྱི་ཞལ་ཕྱེས་ཏེ་དབང་བསྐུར་རོ༎     འདིར་ནི་སློབ་དཔོན་ཆེན་པོས་མཁའ་འགྲོ་ཡེ་ཤེས་མཚོ་རྒྱལ་སོགས་མཁའ་འགྲོ་འབུམ་དང་བཅས་པ་ལ་མཁའ་འགྲོ་སྙིང་ཐིག་གི་སྨིན་གྲོལ་རྫོགས་པར་བསྩལ་ལོ༎    འདིར་ནི་སློབ་དཔོན་ཆེན་པོས་མོན་བོད་ཀྱི་ལྷ་སྲིན་ཐམས་ཅད་དམ་འོག་ཏུ་འཇུག་པའི་ཕྱིར་འཆོལ་བའི་ཁྲོ་རྒྱལ་ཆེན་པོ་རྡོ་རྗེ་གྲོ་ལོད་ཀྱི་སྐུར་བཞེངས་སོ་ཞེས་སོགས་བསྟན་པར་བྱ་སྟེ།     འདི་དག་གིས་ནི་སློབ་དཔོན་ཐུགས་རྗེ་ཅན་རྗེས་སུ་དྲན་པའི་གདུང་བ་དང་དད་པ་འཕེལ་ཞིང་།    དེའི་མཐུ་ལས་བྱིན་རླབས་སྙིང་ལ་ཞུགས་པའི་ལེགས་ཚོགས་ཀྱི་སྒོ་ཕྱེ་བར་འགྱུར་བ་ཡིན་ནོ༎  
དེ་ཡང་རྒྱ་གར་འཕགས་པའི་ཡུལ་གྱི་ཤར་ཕྱོགས་དང་བོད་ཁ་བ་ཅན་གྱི་ལྷོ་ཕྱོགས་སུ་གནས་པའི་དཔལ་ལྡན་འབྲུག་གི་རྒྱལ་ཁབ་ཅེས་སྡེ་བཞིའི་དཔལ་གྱིས་མངོན་པར་མཐོ་བའི་གླིང་ཆེན་པོ་འདི་ནི།     དུས་འཁོར་རྩ་བའི་རྒྱུད་ལས།   
གང་དུ་ས་སྐྱོང་ཆོས་ལྡན་ཞིང་།།  
གང་ཞིག་ཁོ་ནར་སྐྱེ་དགུ་རྣམས༎  
བདེ་བར་གནས་ཤིང་འཛིན་རྩོད་མེད༎   
དེར་ནི་རྣལ་འབྱོར་ཡང་དག་བརྩམས་ཞེས་གསུངས་པ་ལྟར།    དེང་སྐབས་འཛམ་བུ་གླིང་གི་ས་གཞིའི་ཁྱོན་འདིར་སྤྱིར་ས་སྐྱོང་ཆོས་ཀྱི་རྒྱལ་པོས་མངའ་དབང་བསྒྱུར་བའི་གནས་ཡིན་པས་གཞན་ལས་ཁྱད་དུ་འཕགས་པར་མ་ཟད།  ཁྱད་པར་ཐེག་པ་ཆེན་པོ་གསང་སྔགས་ཀྱི་ཆོས་ལམ་རིམ་པ་གཉིས་ཀྱི་རྣལ་འབྱོར་ལ་སྤྱོད་པའི་ཆོས་ཀྱི་རྒྱལ་པོ་རིག་འཛིན་བྱང་ཆུབ་སེམས་དཔས་སྐུ་གསུང་ཐུགས་ཀྱིས་བདག་གིར་བཞེས་པའི་གནས་གཅིག་པུ་དེ་ཡིན་སྟབས།    སྒྲུབ་པའི་རྒྱལ་མཚན་འཛུག་པར་འདོད་པའི་སྐལ་བཟང་རྣམས་ཀྱིས་ཡུལ་འདི་ཉིད་དུ་སྒྲུབ་པའི་རྒྱལ་མཚན་འཛུག་པར་བྱ་བ་ཤིན་ཏུ་གལ་ཆེ་ཞིང་།    བོད་གངས་ཅན་གྱི་ལྗོངས་ནི།    འཇམ་དཔལ་རྩ་བའི་རྒྱུད་ལས།  
སྟོན་པའི་གསུང་རབ་ས་སྟེང་དུ༎ 
དུས་མཐར་འཇིག་ཅིང་ཉམ་པ་ན༎  
སྡོམ་བརྩོན་རྒྱལ་པོའི་ཚུལ་གྱིས་ནི༎   
འབྱུང་བར་འགྱུར་བ་ཐེ་ཚོམ་མེད་ཅེས་དང་།     བཀའ་གདམས་ཕ་ཆོས་སོགས་གུང་བསྒྲིགས་ན།   འཕགས་པ་སྤྱན་རས་གཟིགས་དབང་ཕྱུག་སྡོམ་བརྩོན་རྒྱལ་པོའི་ཚུལ་གྱིས་རོལ་བའི་ཐེག་ཆེན་ཐུན་མོང་མ་ཡིན་པའི་རྒྱལ་ཁབ་ཡིན་པ་དང་།      གུ་རུ་རིན་པོ་ཆེ་དང་རྩ་བརྒྱུད་ཀྱི་བླ་མ་རྣམས་ཀྱིས་བྱིན་གྱིས་བརླབས་པའི་གནས་ཆེན་བསམ་གྱིས་མི་ཁྱབ་པ་མང་དུ་བཞུགས་ཀྱང་།    དེང་སང་སྡིག་སྤྱོད་ཀླ་ཀློའི་དབང་དུ་གྱུར་ནས་བཤན་པ་དང་།  གདོལ་བ།   རྔོན་པ།    སྨད་ཚོང་།    ཇག་རྐུན་སོགས་ཀྱིས་གང་ཞིང་།    རྫས་ངན་དང་དམ་གྲིབ་ཀྱིས་གནས་ཆེན་རྣམས་སུ་མནོལ་གྲིབ་ཚད་མེད་ཕོག་པའི་ཁར།   འགྲོ་འདུག་གི་རང་དབང་ཡང་གཏན་བྲལ་དུ་གྱུར་ཏེ།    གང་དུ་ཕྱིན་ཀྱང་སེམས་ཀྱི་ཕུག་ན་དངངས་སྐྲག་དང་འཚེར་སྣང་ཡ་མ་བྲལ་བར་སྡོད་དགོས་པས།   ད་ནི་རང་བྱུང་པདྨ་རྒྱལ་པོའི་མན་ངག་གི་གསང་ལམ་ལ་བརྟེན་ནས་ཟུང་འཇུག་གདོད་མའི་རྒྱལ་སར་བསྙེག་པར་འདོད་པ་དག་གིས།     སའི་སྟེང་གི་མཐའ་མཇུག་གི་དག་ཞིང་གཅིག་པུ་དཔལ་ལྡན་འབྲུག་གི་རྒྱལ་ཁབ་འདི་ཉིད་སྒྲུབ་གནས་ཀུན་གྱི་སྙིང་པོར་བཟུང་འོས་པ་ཡིན་ནོ༎   
འབྲུག་གི་རྒྱལ་ཁབ་སྤྱིའི་སྒྲོམ་ཙམ་ནི།    དུས་རབས་གསར་པའི་ཞིབ་འཇུག་གི་རྙེད་དོན་དང་ཐ་སྙད་ལྟར་ན་རྒྱལ་ཁབ་ཧྲིལ་བོར་ས་ཁྱོན་ལ་སྤྱི་ལེ་གྲུ་བཞི་མ ༤༧༠༠༠ དང་།    མི་གྲངས། ༡༦༨༩༠༠༠ ཙམ་ཡོད་པར་བཤད་ཅིང་།   ཡུལ་འདི་ལ་སྔ་ལོང་དང་།   ཤར་ཕྱོགས།    ལྷོ་མཚམས་པ།   ཉེ་བའི་དུས་ཀྱི་བོད་མི་གཞིས་ཆགས་སོགས་མི་རིགས་དང་སྐད་རིགས་ཀྱང་མི་འདྲ་བ་མང་དུ་མཆིས།     སྔ་དུས་འབྲུག་གི་ཡུལ་ཕྱོགས་སོ་སོ་རང་མགོ་རང་ཐོན་གྱི་ངང་དུ་སིལ་བུར་གནས་པ་ལ།     ཕྱི་ལོ ༡༦༡༦ ལོར་མཐུ་སྟོབས་དབང་ཕྱུག་ཞབས་དྲུང་ངག་དབང་རྣམ་རྒྱལ་གྱིས་འབྲུག་གི་རྒྱལ་ཁབ་ཧྲིལ་པོ་གཅིག་གྱུར་ཏུ་བྱས་ཤིང་།     ཞབས་དྲུང་རང་ཉིད་ཆོས་ཀྱི་དབུ་ཁྲིད་དང་།      སྡེ་སྲིད་སྲིད་ཀྱི་རྗེ་བོར་བསྐོས་ཏེ་ཆོས་ཁྲིད་ཀྱི་དབུ་ཁྲིད་སོ་སོར་བྱ་བའི་སྲོལ་བཏོད།       ཕྱི་ལོ ༡༩༠༧ ལོར་༧གོང་ས་ཨོ་རྒྱན་དབང་ཕྱུག་འབྲུག་ཡུལ་གྱི་རྒྱལ་པོར་ཐོག་མར་བསྐོས་པ་ནས་བཟུང་།     ད་ལྟའི་འབྲུག་རྒྱལ་ལྔ་པ་འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་གི་བར་ཤིན་ཏུ་སྐྱིད་པའི་རྒྱལ་རབས་ལྔ་སོང་ཞིང་།     ཕྱི་ལོ ༡༩༧༡ ལོར་མཉམ་འབྲེལ་རྒྱལ་ཚོགས་ཀྱི་ཚོགས་ཁོངས་སུ་ཞུགས་པ་དང་།      དུས་རབས་ཉེར་གཅིག་པའི་སྟོད་ལ་རང་དབང་དམངས་གཙོའི་རྒྱལ་ཁབ་ཅིག་ཏུ་གྱུར།     ཕྱི་ལོ་༢༠༠༥ ལོར་འབྲུག་རྒྱལ་པོས་རྩ་ཁྲིམས་གསར་བ་འགའ་ཁྱབ་བསྒྲགས་མཛད་པ་ནས་བཟུང་།     དེང་གི་ཆར་ཡུལ་ཁམས་སྤྱི་ལ་འབྲུག་གི་ནོར་བུ་རུ་གྲགས་པ་ཆོས་རྒྱལ་ཡབ་ཡུམ་གྱིས་གཟིགས་རྟོགས་མཛད་བཞིན་ཡོད་ཀྱང་།   སྲིད་ཀྱི་ཁ་ལོ་ནི་མི་མང་གིས་འོས་འདེམས་ཞུས་པའི་གྲོས་ཚོགས་ཀྱིས་སྐྱོང་བཞིན་པ་ཡིན་ནོ༎    
 བསྟན་པ་རིན་པོ་ཆེའི་དབང་དུ་བྱས་ན།     དུས་རབས་བདུན་པར་འབྲུག་གི་ཡུལ་འདིར་སངས་རྒྱས་ཀྱི་བསྟན་པ་དབུ་བརྙེས་ཙམ་བྱུང་ཡང་དར་རྒྱས་མ་བྱུང་བ་ལ།  དུས་རབས་བརྒྱད་པར་སློབ་དཔོན་ཆེན་པོ་པདྨ་འབྱུང་གནས་བྱོན་ཏེ།     མཐུ་དང་རྫུ་འཕྲུལ་གྱིས་བུམ་ཐང་ལྕགས་མཁར་རྒྱལ་པོ་སོགས་ཡུལ་འདིའི་ཆེ་དགུ་དུ་མ་དབང་དུ་བསྡུས་ནས་རྒྱལ་བསྟན་དར་ཞིང་རྒྱས་པར་མཛད་པའི་དྲིན་ལས།     ཐེག་པ་ཆེན་པོ་གསང་སྔགས་ཀྱི་ཆོས་ལ་ཉམས་བཞེས་ཀྱི་མཐིལ་དུ་བྱེད་པའི་དེང་དུས་ཀྱི་ཆོས་ལྡན་རྒྱལ་ཁབ་འདི་ཉིད་བྱུང་།    དེ་ཡང་པདྨ་བཀའ་ཐང་ལས།    རྒྱལ་པོས་མོན་ལ་ཤོག་བུ་སྡུད་དུ་བཏང་ཞེས་སོགས་གསུངས་པ་ལྟར་སྔོན་ཡུལ་འདིར་མོན་ཡུལ་དུ་གྲགས་པ་ཡིན་ཡང་།      ཕྱིས་ཞབས་དྲུང་རིན་པོ་ཆེས་མཐུ་སྟོབས་དང་ནུས་པ་ལ་བརྟེན་ནས་འབྲུག་པ་བཀའ་བརྒྱུད་ཀྱི་བཤད་སྒྲུབ་དར་རྒྱས་སུ་མཛད་པས།    ཆོས་བརྒྱུད་ཀྱི་མིང་རྒྱལ་ཁབ་ལ་ཐོགས་སྟེ་འབྲུག་གི་རྒྱལ་ཁབ་ཅེས་ཡོངས་སུ་གྲགས་པར་གྱུར་ཏོ༎   
རྒྱལ་ཁབ་འདིའི་མི་རིགས་ནི་གཡས་གཡོན་གྱི་རྒྱལ་ཁབ་ཀུན་གྱི་མི་རིགས་ལས་ཆེས་ཁྱད་དུ་འཕགས་ཤིང་ངོ་མཚར་བ་ཞིག་སྟེ།    ཀུན་མཁྱེན་ཆེན་པོ་དྲི་མེད་འོད་ཟེར་གྱིས་མཛད་པའི་བུམ་ཐང་ལྷའི་སྦས་ཡུལ་གྱི་བཀོད་པ་གསལ་བར་བྱེད་པ་མེ་ཏོག་གི་སྐྱེད་མོས་ཚལ་ལས།   
འདིར་ནི་མི་རྣམས་རང་བཞིན་དགེ་བ་སྟེ།།   
རི་དྭགས་མི་རྔོན་ལམ་སྲང་ཆོམ་པོ་མེད།།    
རྐུན་པོ་ཉུང་ཞིང་གཞན་གནོད་འཚེ་བ་ཆུང་།།    
རང་གིས་རྒྱུད་འཇམ་འགྲོཊ་ན་བདེ་བ་ལགས།།    
ཡུལ་འདིའི་མི་རྣམས་བརྙས་སུ་མི་རུང་སྟེ།།   
ཁ་ཅིག་དཔའ་བོ་མཁའ་འགྲོའི་རིགས་ཡིན་ལ།།   
ལ་ལ་ཕྲིན་ལས་གཉན་ས་གནོན་ལ་མཁས།།    
ཕལ་རྣམས་མཆོག་ཏུ་ངོ་མཚར་ཆེ་བ་ལགས།།   
འདི་ན་ལུགས་བཟང་གློ་བུར་ལྷགས་ལ་བྱམས།།   
གང་དུ་འགྲོ་ཡང་ལམ་རྒྱགས་མི་དགོས་ལ།།   
ཉེ་དུའི་ཁྱིམ་ལས་ལྷག་པའི་སྣ་ལེན་དང་།།   
བྱ་དགའ་ཆེ་བས་བསྐལ་པ་བཟང་པོ་བཞིན།།    
ཡུལ་འདིའི་རང་བཞིན་ཞིབ་མོར་བསམ་པ་ན།།   
དབུས་གཙང་དག་པའི་ཞིང་ལས་ལྷག་པ་བཞིན།།   
འཚེ་བ་མེད་པས་དམ་ཆོས་སྒྲུབ་པའི་གནས།།   
ཡུལ་ཁམས་གཞན་ལས་ཁྱད་པར་འཕགས་སོ་ཀྱེ།།   ཞེས་དང་།   ཉེ་བའི་དུས་སུ་ཡང་ཆོས་རྗེ་མཁན་ཆེན་འཇིགས་མེད་ཕུན་ཚོགས་འབྱུང་གནས་ཞབས་དང་།   མཁན་ཆེན་བླ་མ་ཚུལ་ཁྲིམས་བློ་གྲོས།   མཁན་ཆེན་བསོ་དར་རྒྱས་སོགས་དམ་པ་དུ་མས།    མི་རྣམས་སྐྱིད་ཅིང་རང་བཞིན་བཟང་བའི་ཚད་དུ་འབྲུག་གི་མི་རིགས་ཅེས་ཡང་ཡང་གསུངས་པ་བཞིན།   དེང་གི་དུས་སུ་ཡང་ཀླ་ཀློའི་དབང་དུ་མ་གྱུར་ཅིང་།     ཀླ་ཀློའི་མིའི་ཀུན་སྤྱོད་དང་ཐག་མི་ཉེ་བའི་དབང་གིས་མི་རྣམས་རང་བཞིན་གྱིས་གཡོ་རྒྱུ་ཆུང་བ།   གནོད་སེམས་དང་འཁོན་སེམས་ཆུང་ཞིང་ཁ་ན་མ་ཐོ་བའི་ཚིག་མི་བརྗོད་པ།    མནའ་མི་ཟ་ཞིང་རྫུན་མི་བཤད་པ།     རྐུན་ཇག་དང་རྔོན་མི་བྱེད་པ།    མཆོག་གསུམ་དང་ལས་འབྲས་ལ་བརྩི་ཞིང་ཡར་མར་ཀུན་ལ་ལོག་ལྟ་སྐུར་འདེབས་བྱེད་པའི་ལུགས་སྲོལ་མེད་པར་ཕན་ཚུན་གུས་བརྩི་དང་བྱམས་སེམས་ཀྱིས་འཚོ་བ།   ཕ་མ་དང་རྒན་རབས་ལ་སྲི་ཞུ་ཆེ་བ།    སྤུན་མཆེད་དང་ཁྱིམ་མཚེས་མཛའ་གྲོགས་རྣམས་ལ་འབྲེལ་ལམ་ཟབ་ཅིང་ཕན་ཚུན་བྱམས་སྐྱོང་བཟང་བ།     གཤིས་སྤྱོད་དང་ངག་ཚིག་འཇམ་པ།     མགྲོན་པོར་སྣེ་ལེན་དང་བསྟི་སྟངས་ཆེ་བ།      ཅ་དངོས་ཉོ་ཚོང་དང་གླ་འཁོར་སོགས་ལ་རྒྱུས་ཡོད་མེད་དང་བསྟུན་ནས་མགོ་མི་སྐོར་བ་སོགས་ཕྱོགས་གང་ཐད་ནས་ཡ་རབ་དམ་པའི་ཡོན་ཏན་གྱིས་ཀུན་ནས་བརྒྱན་པ་ཕན་ཚུན་འགྲན་པ་ལྟ་བུར་འདུག་པས།     ཅུང་གོམས་འདྲིས་སུ་མ་སོང་ན་ཐོག་མའི་ཆར་རང་གི་མིག་ལ་ཡང་ཡིད་ཆེས་དཀའ་བར་ཡོད་པ་འདིར་དངོས་སུ་ཕེབས་དང་གཟིགས་པར་འགྱུར་རོ༎    
ད་ནི་སྐབས་སུ་བབ་པ་སྤ་གྲོ་སྟག་ཚང་གི་གནས་ཀྱི་བཤད་པ་དངོས་ལ་འཇུག་པར་བྱ་སྟེ།    དེ་ཡང་དགོངས་འདུས་ལས།   
ཤིན་ཏུ་གདུག་ཅིང་གཏུམ་པ་ལ༎  
ཞི་བས་ཕན་པར་མི་འགྱུར་ཏེ༎  
ཤེས་རབ་ཐབས་ཀྱི་ཕྱག་རྒྱ་ལས༎  
ཁྲོ་བོར་དེ་བཞིན་གཤེགས་ཀུན་མཛད་ཅེས་དང་།     དཔུང་བཟང་ལས།   
གང་གི་རང་བཞིན་ཆགས་སྡང་རྣམ་བྲལ་ཡང་༎     
ཆགས་པ་ཅན་ལ་ཆགས་བཅས་ལྟར་སྟོན་ཞིང་།།   
གདུག་པ་འདུལ་ཕྱིར་ཁྲོ་ལ་ཁྲོར་སྟོན་པ༎    
ཐབས་ཀྱིས་རྣམ་འདྲེན་དེ་ལ་ཕྱག་འཚལ་ལོ་ཞེས་དང་།    བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་གཏེར་བྱོན་ཡང་གསང་ཐུགས་ཀྱི་ཐིག་ལེའི་ལོ་རྒྱུས་ལུང་གི་བྱང་བུ་ལས།     
ཁྲོ་བས་ཁྲོ་བ་འདུལ་བའི་ཕྱིར༔    
བདག་ཉིད་པདྨ་ཐོད་ཕྲེང་རྩལ༔   
རྡོ་རྗེ་ཁྲོས་པའི་ཏིང་འཛིན་གྱིས༔   
དབང་དྲག་འཆོལ་བའི་སྐུར་ལངས་ཏེ༔    ཞེས་སོགས་གསུངས་པ་ལྟར།     གནས་འདི་ནི་སློབ་དཔོན་ཆེན་པོ་པདྨ་འབྱུང་གནས་ཀྱིས་མོན་བོད་ཀྱི་ལྷ་སྲིན་གདུག་པ་ཅན།    ཞི་བའི་ཕྲིན་ལས་ཀྱིས་མི་ཐུལ་བ་ཐམས་ཅད་དྲག་པོའི་དམ་འོག་ཏུ་འཇུག་པའི་ཕྱིར།    འཇིག་རྟེན་ན་ཆེ་བཙན་འགྲན་ཟླ་མེད་པ་གུ་རུ་དྲག་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་གནས་ཡིན་ཞིང་།     སྤྱིར་སློབ་དཔོན་ཆེན་པོས་ཨུ་རྒྱན་གྱི་རྒྱལ་སྲིད་བསྐྱངས་ཏེ་རྒྱལ་པོ་ཐོར་ཅོག་ཅན་དུ་བཞུགས་པའི་སྐབས་རིགས་ཀྱི་མཁའ་འགྲོ་མ་ཆེན་མོ་བཅུ་དྲུག་གིས་ལོངས་སྤྱོད་རྫོགས་པའི་སྐུ་རུ་མངའ་གསོལ་བ་ལས།    
ཕྲིན་ལས་རྣམ་རྒྱལ་པདྨའི་བྱང་ཕྱོགས་སུ༔    
ཉོན་མོངས་བདུད་འཇོམས་རྡོ་རྗེ་གྲོ་ལོད་སྤྲུལ༔    
འཁོར་དུ་ཀརྨ་མཁའ་འགྲོ་མ་ཚོགས་བསྐོར༔     
ཡེ་ཤེས་ལྔ་རྫོགས་སྣ་ལྔའི་དཀྱིལ་ན་བཞུགས༔     
རྡོ་རྗེ་གྲོ་ལོད་སྐུ་ལ་ཕྱག་འཚལ་བསྟོད་ཅེས་དང་།       ཨོ་རྒྱན་གྱི་ཡུལ་དུ་ས་ཡི་ལྷ་མོ་བརྟན་མ་འཁོར་བཅས་ཀྱིས་བསྟོད་པ་ལས།     
མུ་སྟེགས་ཡུལ་བྱོན་དགའ་བའི་ཚལ་དུ་བཞུགས༔    
སྙན་པའི་སྒྲ་ཡིས་ཕྱོགས་མཚམས་ཀུན་ཏུ་ཁྱབ༔    
གསང་སྔགས་ཕྱི་ནང་ཐུགས་ཀྱི་དཀྱིལ་ན་གསལ༔     
རྡོ་རྗེ་གྲོ་ལོད་སྐུ་ལ་ཕྱག་འཚལ་བསྟོད་ཅེས་དང་།       འཇམ་མགོན་ཀོང་སྤྲུལ་གྱི་བཀའ་ཐང་དོན་བསྡུས་ལས།    
ལི་ཡུལ་དུར་ཁྲོད་ལོ་ཀ་བརྩེགས་པར་བྱོན༎         
རྡོ་རྗེ་གྲོ་ལོད་གྲགས་ལ་ཕྱག་འཚལ་ལོ་ཞེས་དང་།    པདྨ་བཀའ་ཡི་ཐང་ཡིག་ལེའུ་སོ་གསུམ་པར་དུར་ཁྲོད་པདྨ་བརྩེགས་སུ་བཞུགས་པ་ལས།     
ཤིན་ཏུ་འཇིགས་པའི་དུར་ཁྲོད་ཆེན་པོ་དེར༔   
ལོ་ལྔར་བཞུགས་ནས་མཁའ་འགྲོར་ཆོས་འཁོར་བསྐོར༔    
མཚན་ནི་རྡོ་རྗེ་གྲོ་ལོད་ཅེས་བྱར་གྲགས་ཞེས་དང་།        འཇམ་མགོན་ཀོང་སྤྲུལ་བློ་གྲོས་མཐའ་ཡས་དང་།     ཤུག་ཆུང་སྤྲུལ་སྐུ་ཚུལ་ཁྲིམས་བཟང་པོ་སོགས་ཀྱིས།     སློབ་དཔོན་ཆེན་པོར་ཐོག་མར་བསམ་ཡས་ཀྱི་ས་གཞི་འདུལ་བའི་སྐབས་དང་།     བར་དུ་བདུད་བློན་རྣམས་ཀྱིས་སྐུ་ལ་ཐོ་བརྩམས་པའི་དུས་དང་།     མཐར་རྔ་ཡབ་པདྨ་འོད་དུ་གཤེགས་ཁར་མོན་སྤ་གྲོ་སྟག་ཚང་སེང་གེ་ཕུག་སོགས་ཁམས་བོད་ཀྱི་སྟག་ཚང་མིང་ཅན་བཅུ་གསུམ་དུ།        བདུད་འདུལ་རྡོ་རྗེ་གྲོ་ལོད་རྩལ་གྱི་སྐུར་བཞེངས་ནས་མི་དང་མི་མ་ཡིན་གདུག་ཅིང་གཏུམ་པ་ཐམས་ཅད་ཚར་བཅད་ཅིང་རྗེས་སུ་བཟུང་ནས་དམ་ལ་བཞག་པས་མཚོན་ཞེས་གསུངས་པ་ལྟར།      སློབ་དཔོན་ཆེན་པོའི་མཛད་པ་སྣ་ཚོགས་དང་།     སྐུའི་བཀོད་པ་སྣ་ཚོགས་དང་བསྟུན་པའི་མཚན་གྱི་རྣམ་གྲངས་སྣ་ཚོགས་སུ་གྲགས་པའི་སྐབས།     གནས་གཞན་དང་དུས་གཞན་རྣམས་སུ་ཡང་རྡོ་རྗེ་གྲོ་ལོད་ཀྱི་མཚན་དུ་གྲགས་པ་ཡོད་ཀྱང་།     སྙིགས་དུས་ཀྱི་སེམས་ཅན་སྤྱི་དང་།    ཁྱད་པར་ཆོས་ཚུལ་བཞིན་དུ་བྱེད་པའི་གང་ཟག་རྣམས་ལ་དངོས་བརྒྱུད་གཉིས་ནས་བརྡོ་བའི་ནག་པོའི་རྩ་ལག     རྒྱལ་འགོང་དམ་སྲི་གདུག་པ་ཅན་མ་ལུས་པ་དྲག་པོ་མངོན་སྤྱོད་ཀྱིས་འདུལ་བའི་བདུད་ཀྱི་བདུད་དགྲ་ཆེན་པོ།      ཆེ་མཆོག་འཆོལ་བའི་ཁྲོ་རྒྱལ་གུ་རུ་དྲག་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་རྩ་བའི་གནས་ནི་མོན་གྱི་སྤ་གྲོ་སྟག་ཚང་དུ་གྲགས་པ་འདི་ཉིད་ཁོ་ན་ཡིན་ཏེ།    རུ་ལག་གྲོམ་པ་རྒྱང་གི་ཨོ་རྒྱན་སྒྲུབ་ཕུག་ནས་སྤྲུལ་སྐུ་བཟང་པོ་གྲགས་པས་གཏེར་ནས་བཏོན་ཅིང་།    རིག་འཛིན་རྒོད་ལྡེམ་ཅན་གྱིས་ཤོག་སེར་ལས་བསྒྱུར་བའི་གསོལ་འདེབས་ལེའུ་བདུན་མ་ལས།     
སྟག་ཚང་སེང་གེ་བསམ་འགྲུབ་ཀེའུ་ཚང་དུ༔  
གདུག་པའི་མུ་སྟེགས་བདུད་དང་དམ་སྲི་བཏུལ༔  
གནས་ཆེན་གངས་བྲག་རྣམས་ལ་གཏེར་ཆེན་སྦས༔  
མ་འོངས་སྙིགས་མའི་སེམས་ཅན་ཐུགས་རྗེས་གཟིགས༔  
རྡོ་རྗེ་གྲོ་ལོད་རྩལ་ལ་གསོལ་བ་འདེབས་ཞེས་དང་།    རྒྱལ་དབང་ལྔ་པའི་དག་སྣང་གསང་བ་རྒྱ་ཅན་གྱི་རྡོ་རྗེ་གྲོ་ལོད་སྒྲུབ་པ་ལས། 
སྟག་ཚང་སེང་གེ་བསམ་འགྲུབ་ཀེའུ་ཚང་དུ༎    
མུ་སྟེགས་དྲེགས་པ་ཚར་གཅོད་དངོས་གྲུབ་བརྙེས༎    
འཆོལ་བའི་ཁྲོ་རྒྱལ་རྡོ་རྗེ་གྲོ་ལོད་ཀྱི༎  
དབང་བསྐུར་ཞེས་སོགས་དང་།      གཏེར་ཆེན་ཆོས་རྗེ་གླིང་པའི་ཁ་རག་མགོ་དགུའི་བདུད་མཚོའི་གཏེར་བྱོན།      མ་ཧཱ་གུ་རུ་དྲག་པོར་སྒྲུབ་པའི་དབང་ཆོག་ཟབ་གསང་འདོད་འཇོ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པར་གཏེར་གཞུང་རྡོ་རྗེའི་ཚིག་དྲངས་པ་ལས།    དེའང་ཁ་ཁྲ་མོན་གྱི་ས་མཚམས༔    བོད་ཁམས་གངས་རི་རྩེ་དགུའི་ལྷོ་ཕྱོགས༔      གྱད་ཀྱི་ཡུལ་སཱ་ལའི་ཚལ་དང་ཉེ་བའི་ས་མོན་ཁ་སྤ་གྲོ་སྟག་ཚང་མི་འགྱུར་རྡོ་རྗེའི་བྲག་གི་ཕུག་པར༔     ཨོ་རྒྱན་ཆེན་པོ་པདྨ་རྒྱལ་པོ་ཉིད་བདུད་འདུལ་མ་ཧཱ་གུ་རུ་དྲག་པོ་རྩལ་དུ་བཞེངས་ནས༔    མོན་བོད་གཉིས་ཀྱི་ལྷ་འདྲེ་ཐམས་ཅད་བཀའ་དམ་ལ་བཏགས་པའི་ཚེ་ཞེས་དང་།     འཇའ་ཚོན་དཀོན་མཆོག་སྤྱི་འདུས་ཀྱི་དབང་ཆོག་རཱ་ག་ཨ་སྱས་མཛད་པ་ལས།      ཤཱཀྱ་སེང་གེའི་བསྟན་པ་འདི་ལ།     ཨོ་རྒྱན་རིན་པོ་ཆེ་དྷ་ན་ཀོ་ཤའི་མཚོ་གླིང་དུ་འཁྲུངས་མ་ཐག       དྲག་པོ་མཐིང་ཀའི་སྐུར་བཞེངས་ནས་གཟའ་དང་ཀླུ་ཐམས་ཅད་དམ་ལ་བཏགས།     གུ་རུ་སྤྲུལ་པའི་མཚན་བརྒྱད་དུ་སྤྲུལ་ནས་འགྲོ་བའི་དོན་རླབས་པོ་ཆེ་མཛད་པ་སྤྱི་དང་།     བྱེ་བྲག་མོན་ཁ་སྤ་གྲོ་སྟག་ཚང་སེང་གེ་བསམ་འགྲུབ་ཏུ་རྡོ་རྗེ་གྲོ་ལོད་ཀྱི་སྐུར་བཞེངས་ནས།    གདུག་པ་ཅན་གྱི་མུ་སྟེགས་བདུད་དང་དམ་སྲི་ལ་སོགས་པ་ཚར་བཅད་རྗེས་སུ་བཟུང་ནས་ཞེས་སོགས་དང་།     གཏེར་སྟོན་བརྒྱ་རྩའི་རྣམ་ཐར་འཇམ་མགོན་ཀོང་སྤྲུལ་གྱིས་མཛད་པ་ལས།  དམ་ཚིག་སྒྲོལ་མ་མོན་མོ་བཀྲ་ཤིས་ཁྱེའུ་འདྲེན་ནི།   མོན་ཚ་འོག་ཏུ་འཁྲུངས།    ཆུང་ངུ་ནས་ཆོས་ཀྱི་རིགས་སད་པ་དང་མནལ་ལམ་དུ་མཁའ་འགྲོས་བརྡས་བསྐུལ་ནས་ལྷོ་བྲག་ཏུ་བྱོན།    ཐོག་མར་ཡེ་ཤེས་མཚོ་རྒྱལ་གྱིས་རྗེས་སུ་བཟུང་ཞིང་སྨིན་པར་མཛད།    སླར་ལ་ཡག་མོན་མཁར་སྟེང་དུ་ཨོ་རྒྱན་རིན་པོ་ཆེ་མཇལ།     ཟབ་མོའི་གདམས་པ་སྙིང་པོར་དྲིལ་ནས་གསུངས་པས་དངོས་གྲུབ་བརྙེས།    ཕྲིན་ལས་ཀྱི་གཟུངས་མར་བཞེས།    སྤ་གྲོ་སྟག་ཚང་དུ་སློབ་དཔོན་ཆེན་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་སྐབས་སུ་སྐུ་ལུས་འདོད་རྒུར་བསྒྱུར་བས་སྟག་མོའི་ཚུལ་དུ་སྤྲུལ་ནས་ཆིབས་ཀྱི་རྣམ་པར་མཛད་ཅེས་དང་།     ཁྲག་འཐུང་བདུད་འཇོམས་གླིང་པའི་གཏེར་བྱོན་ཟབ་གསང་མཁའ་འགྲོའི་སྙིང་ཐིག་གི་གྲོ་ལོད་སྒྲུབ་ཐབས་ལས།    
བདག་འདྲ་པདྨ་བདུད་འཇོམས་ངས༔   
མ་འོངས་འགྲོ་བློའི་མུན་ཁམས་སུ༔  
ཕན་བདེའི་ཉི་མ་འཆར་བའི་ཕྱིར༔    
སྟག་ཚང་བསམ་འགྲུབ་ཀེའུ་ཚང་དུ༔   
རང་གི་སྒྲུབ་པ་རང་གིས་བྱས༔   
བསྟན་པ་མི་ནུབ་དར་རྒྱས་ཕྱིར༔   
མི་འགྱུར་རྡོ་རྗེའི་གཏེར་དུ་སྦས་ཞེས་དང་།     བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་གཏེར་བྱོན་ཡང་གསང་ཐུགས་ཀྱི་ཐིག་ལེའི་ལོ་རྒྱུས་ལུང་གི་བྱང་བུ་ལས།   
དེ་ཡང་གདོང་དམར་བོད་ཡུལ་མཐའ༔  
ཁ་ཁྲ་མོན་གྱི་ས་མཚམས་ནི༔   
སྤ་གྲོ་སྟག་ཚང་དཔལ་གྱི་ཕུག༔  
སེང་གེ་བསམ་འགྲུབ་ཀེའུ་ཚང་དུ༔     
ཁྲོ་བས་ཁྲོ་བ་འདུལ་བའི་ཕྱིར༔    
བདག་ཉིད་པདྨ་ཐོད་ཕྲེང་རྩལ༔   
རྡོ་རྗེ་ཁྲོས་པའི་ཏིང་འཛིན་གྱིས༔   
དབང་དྲག་འཆོལ་བའི་སྐུར་ལངས་ཏེ༔   
མོན་བོད་གངས་ཅན་མཐའ་དབུས་ཀྱི༔    
འདྲེ་བགེགས་རྒྱལ་བསེན་དམ་སྲི་བཏུལ༔    
དྲེགས་ལྡན་ལྷ་འདྲེ་གཞི་བདག་ཚོགས༔   
དབང་བསྡུས་སྲོག་སྙིང་དངོས་སུ་བླངས༔
གནས་དང་གཏེར་གྱི་ཁ་བྱང་གཏད་ཅེས་སོགས་དང་།     གཏེར་ཁ་གཞན་ལས་ཀྱང་ཚུལ་འདི་དང་མཚུངས་པ་མང་དུ་བྱུང་སྟེ་ཡི་གེས་འཇིགས་ནས་དེ་ཙམ་དུ་བྱས་སོ༎ 
དེ་ལྟར་སློབ་དཔོན་ཆེན་པོ་རྡོ་རྗེ་གྲོ་ལོད་ཀྱི་སྐུར་བཞེངས་པའི་གནས་མཆོག་བྱིན་རླབས་དང་ངོ་མཚར་རྨད་དུ་བྱུང་བ།    སྤ་གྲོ་སྟག་ཚང་ཞེས་འཇིག་རྟེན་ན་ཡོངས་སུ་གྲགས་པའི་གནས་ཀྱི་ལྟེ་བ་དངོས་ནི།      སྐྱེར་ཆུའི་གཡོན་ཕྱོགས་སུ་ཡོད་པའི་ལུང་པ་ཞིག་གི་ཕུག་ཏུ་བྲག་རི་མཐོ་ཞིང་གཟར་བ།    ཤིན་ཏུ་འཇིགས་ཤིང་ངམ་གནག་པ།    ཁྲོ་བོའམ་སེང་གེ་ཆེན་པོའི་གདོང་དབྱིབས་སུ་མ་བཅོས་རང་བྱུང་ལྷུན་གྲུབ་ཀྱིས་གནས་པ།     རི་རྩེའི་བྲག་ལས་ལྷུང་བའི་ཆུ་བོའི་རླབས་སྒྲ་འཕྱོ་ཞིང་།     རི་ཕན་ཚུན་གྱི་བར་དུ་རྫུ་འཕྲུལ་ལྟ་བུས་སྦྲེལ་བའི་དར་ཅོག་གི་འཇའ་རིས་བཀྲ་བ།     སྤྲིན་དཀར་གྱི་ལ་ཐོད་དཀྲིས་ཤིང་།     ནགས་ཚལ་གྱི་གོས་བཟང་གྱོན་པ།    འཇིགས་པའི་གཡང་ཆེན་པོ་མིག་གིས་བལྟ་མི་བཟོད་ཅིང་རྨི་ལམ་དུ་ཡང་འཁོར་ཡོང་བ་དེ་ལྟ་བུ་ཞིག་གི་རྩེ་ལྐོག་ཏུ་གནས་ཤིང་།   དེ་ཡང་ཐོག་མར་ལུང་པའི་མདའ་ནས་ཡར་རི་གཤམ་བར་དུ་རླངས་འཁོར་གྱི་ནང་ནས་འགྲོ་ཆོག་པ་དང་དེ་ནས་རྐང་ཐང་གིས་འགྲོ་དགོས།    རི་གཤམ་དུ་ཡོད་པའི་རླངས་འཁོར་འབབ་ཚུགས་དེའི་མིང་ལ་རམ་ཐོང་ཁ་(Ramthongkha) ཞེས་ཟེར་ཞིང་།     འདིར་ཐང་ཁྲོམ་ཆུང་ངུ་ཞིག་ཡོད་པ་དེར་སྟབས་བདེའི་ཁ་ཟས་མོག་མོག་སོགས་དང་།     རི་འགོར་འགོ་བྱེད་ཀྱི་ལག་རྟེན།     ད་དུང་དགོས་མཁོ་ཡོད་མེད་ཅ་ལག་འགའ་རེ་རྒྱུན་དུ་འཚོང་རྒྱུ་ཡོད་པ་དང་།     རྟ་དྲེལ་དགོས་མཁན་རྣམས་ལ་འདིར་རྟ་དྲེལ་གླ་རྒྱུ་ཡོད།    
སྟག་ཚང་ལྷ་ཁང་ཡོད་ས་དེ་ནི་སྤ་གྲོ་ལས་མཐོ་ཚད་མི་ཊར་ ༨༠༠ ཙམ་གྱི་ས་ན་ཡོད་ཅིང་།     ཐོག་མར་སྟག་ཚང་གི་གཡས་རིའི་རི་ངོས་ལ་ཡར་འཛེགས་ཏེ།     གནས་ཀྱི་ལྟེ་བའི་ཐད་ཀར་ཡོད་པའི་བྲག་གཡང་གཟར་མོ་མིག་གིས་བལྟ་མི་བཟོད་པ་དེར་སླེབས་རྗེས་ཡང་སྟག་ཚང་ཕུག་པའི་མདུན་གྱི་ལུང་གཞུང་དུ་མར་འབབ་ཅིང་།     དེ་ནས་སླར་ཡང་སྟག་ཚང་ལ་ཡར་འཛེགས་དགོས་པས།      འབྲུག་པ་རྣམས་ཀྱིས་རྐང་ཐང་གིས་ཆུ་ཚོད་གཅིག་དང་ཕྱེད་ཀྱི་རིང་འགྲོ་དགོས་ཟེར་ཀྱང་དལ་མོར་ཕྱིན་ན་ཆུ་ཚོད་གཉིས་ལྷག་འགོར་བཞིན་འདུག      སྤྱིར་མགྱོགས་ལམ་དང་རིང་ལམ་གཉིས་ཡོད་པ་ལས་རིང་ལམ་ལ་རྟ་བོང་དང་མཉམ་དུ་འགྲོ་ཆོག་པར་འདུག་ཅིང་།    ལམ་བར་དུ་ཆུ་ཚོད་མང་པོ་འགོར་སྐད།     མགྱོགས་ལམ་ནི་ཐག་ཅུང་ཉེ་བ་གོང་ཏུ་བཤད་པ་དེ་ཡིན་ལ།     གལ་ཏེ་སྣེ་ཤན་པ་མེད་པར་རང་ཉིད་ཀྱིས་རང་མགོ་འདོན་ནས་འགྲོ་དགོས་ན།     ལམ་བར་དུ་ལམ་རལ་ག་གཉིས་སུ་གྱེས་ཡོད་ཚད་ལ་ལག་པ་གཡས་ཕྱོགས་ཀྱི་ལམ་ཁོ་ན་དེད་ནས་ཕྱིན་ན་ནོར་ས་གཞན་མེད།     འོན་ཀྱང་རི་ངོས་ཤིན་ཏུ་གཟར་ཞིང་དོགས་པས་རང་གི་གཟུགས་པོའི་གནས་བབས་དང་བསྟུན་ཤེས་པ་གལ་ཆེ་བར་འདུག    
ལར་ཐིམ་ཕུག་ནས་སྤ་གྲོའི་གནམ་ཐང་བར་ཆུ་ཚོད་གཅིག་དང་།    དེ་ནས་སྟག་ཚང་གི་གནས་མདུན་བར་སྐར་མ་བཅོ་ལྔ་ཉི་ཤུ་ཙམ་དགོས་པས།      གནས་མཇལ་བ་ཕལ་ཆེ་བ་ཞིག་ཞོགས་པ་སྔ་པོར་ཐིམ་ཕུག་ནས་ཡོང་ཞིང་དགུང་མོར་ཕྱིར་ཐིམ་ཕུག་ཏུ་སླེབས་རྒྱུ་བྱས་ནས་འགྲོ་བཞིན་འདུག་པར་མ་ཟད།     གླ་འཁོར་བ་རྣམས་ཀྱི་གོམས་སྲོལ་ལྟ་བུར།     ཡང་འདུལ་གྱི་གཙུག་ལག་ཁང་སྤ་གྲོ་སྐྱེར་ཆུའི་ལྷ་ཁང་ཡང་ཕྱིར་ཡོང་སྐབས་ལམ་བར་ནས་མཇལ་རྒྱུ་བྱེད་བཞིན་འདུག་ཀྱང་།     དེ་ལྟར་བྱས་ན་ལམ་བར་ནས་བྲེལ་ཤ་ལངས་དགོས་པ་དང་།     ད་དུང་གནས་མཇལ་ཀྱང་ལྷོད་ལྷོད་ཅིག་མི་ཡོང་བས།     སྔ་ནུབ་ཐིམ་ཕུག་ནས་སྤ་གྲོ་ལ་ཡོང་བའམ།   རབ་ཡིན་ན་གནས་མདུན་དང་ཉེ་བའི་སར་མགྲོན་ཁང་མང་པོ་ཡོད་པས་དེར་བསྡད་དེ།     ཉིན་རྗེས་མར་སེམས་པ་བདེ་ལྷོད་ཀྱིས་གནས་མཇལ་དུ་འགྲོ་ན་ཧ་ཅང་ལེགས།     སྟག་ཚང་དང་ཐག་ཉེར་ཡོད་པའི་ཕ་དམ་པའི་སྒྲུབ་ཕུག་སོགས་དང་།     སྟག་ཚང་ནས་ཆུ་ཚོད་གཉིས་ཙམ་གྱི་ལམ་ཐག་ཡོད་པ།     སྔོན་ཀཿཐོག་པ་ཡེ་ཤེས་འབུམ་པའི་གདན་ས་དེང་སང་ཨོ་རྒྱན་རྩེ་རུ་འབོད་པ་ཟངས་མདོག་དཔལ་རིའི་ལྷ་ཁང་ཡོད་ས་དང་།   མཁའ་འགྲོ་འབུམ་གྱི་བྲོ་ར་སོགས་སྟག་ཚང་དང་འབྲེལ་བའི་གནས་རྣམས་ཡོངས་རྫོགས་ལ་མཇལ་དགོས་ན་ནི་ཉིན་གཉིས་གསུམ་ཞིག་གི་དུས་ཚོད་སྔ་ས་ནས་གྲ་སྒྲིག་བྱེད་དགོས།    
སྟག་ཚང་དཔལ་ཕུག་གིས་སྙིང་བཅུད་བྱས་ཏེ།     དེའི་ཕྱི་ལོགས་ནས་ཡར་བཞེངས་པའི་ངོ་མཚར་གྱི་བཀོད་པ་བློ་ལས་འདས་པའི་ལྷ་ཁང་བལྟ་ན་སྡུག་པ་འདི་དག་ནི།      ཐོག་མར་འབྲུག་སྡེ་སྲིད་བཞི་པ་རྒྱལ་སྲས་བསྟན་འཛིན་རབ་རྒྱས་ཀྱིས་ཕྱི་ལོ་༡༦༩༢ ལོར་བཞེངས་མགོ་བཙུགས་ཤིང་།   སྐབས་དེར་ཉིན་མོ་མིས་བརྩིགས་པ་མཚན་མོ་ལྟ་འདྲེས་བཤིགས་ནས་བཞེངས་མ་ཐུབ་པར།        སྡེ་སྲིད་རང་གི་དབུ་སྐྲ་བསིལ་ཏེ་རྩིག་པའི་འདམ་དང་བསྲེས་ནས་བརྩིགས་པས་བར་ཆད་ལས་གྲོལ་བ་དང་།      ཕྱི་ལོ་ ༡༦༩༤ ལོར་གཙུག་ལག་ཁང་ནང་རྟེན་དང་བཅས་པ་ཕལ་ཆེར་བཞེངས་གྲུབ་པར་མཛད།     དེ་རྗེས་ཕྱི་ལོ་༡༩༥༡ ལོར་མེ་སྐྱོན་ཆེན་པོ་བྱུང་སྟེ།     ལྷ་ཁང་ཕལ་ཆེ་བ་མེས་ཚིག་ཀྱང་གུ་རུ་མཚན་བརྒྱད་ལྷ་ཁང་དང་།     གུ་རུ་གསུང་འབྱོན་མའི་ལྷ་ཁང་སོགས་ལྷ་ཁང་ཁག་ཅིག་གིས་མེ་དགྲ་མ་བཞེས་པས་བྱིན་རླབས་ཆེ་བའི་ཚད་དུ་བྱེད།     སྐབས་དེར་མེ་སྐྱོན་ཤོར་བ་རྣམས་ཀྱི་ནང་ནས་ལྷ་ཁང་ཁག་ཅིག་འབྲུག་རྒྱལ་གཉིས་པའི་བཀའ་དགོངས་བཞིན་བཙན་ཏོག་པ་རྣམས་མེ་བསད་པར་འགྲོ་མ་ཐུབ་པའི་ཉེས་ཆད་དུ་བཙན་ཏོག་པ་རྣམས་ལ་བཞེངས་སུ་བཅུག་པ་དང་།       འགའ་ཞིག་རྒྱལ་ཡུམ་ཕུན་ཚོགས་ཆོས་སྒྲོན་གྱི་བཀའ་རྒྱ་ལྟར་རྗེ་མཁན་པོ་བསྟན་འཛིན་དོན་སྒྲུབ་སོགས་ཀྱིས་བཞེངས།    སྤྱི་ལོ་ ༡༩༩༨ སྤྱི་ཟླ་ ༤ པའི་སྤྱི་ཚེས་ ༡༩ ཉིན་སླར་ཡང་མེ་སྐྱོན་བྱུང་བར་འབྲུག་གཞུང་གིས་འགྲོ་སོང་བཏང་སྟེ།      སྤྱི་ལོ་ ༢༠༠༠ ལོར་ལས་གཞི་ཡོངས་སུ་གྲུབ་ནས་རབ་གནས་མཛད་པ་ད་ལྟ་ང་ཚོས་དངོས་སུ་མཇལ་དུ་ཡོད་པ་འདི་དག་ཡིན། 
འདིར་ནང་གསེས་སུ་སྟག་ཚང་དཔལ་ཕུག་དང་།     གུ་རུ་གསུང་འབྱོན་གྱི་ལྷ་ཁང།     ཀུན་ར་ལྷ་ཁང་།    སྨོན་ལམ་གང་བཏབ་འགྲུབ་པའི་ལྷ་ཁང་།     གུ་རུ་རྡོ་རྗེ་གྲོ་ལོད་ཀྱི་ལྷ་ཁང་།   གནས་ཁང་།   ཚེ་དཔག་མེད་ཀྱི་ལྷ་ཁང་།    རྣམ་སྲས་ལྷ་ཁང་།    གུ་རུ་མཚན་བརྒྱད་ཀྱི་ལྷ་ཁང་བཅས་དང་།   ད་དུང་མགྲོན་བསུ་ཁང་དང་།    མར་མེ་འབུལ་ཁང་སོགས་ཡོད་ཅིང་།     
    དེ་ཡང་དཔལ་ཕུག་ནི་གུ་རུ་རིན་པོ་ཆེ་རྡོ་རྗེ་གྲོ་ལོད་ཀྱི་སྐུར་བཞེངས་པའི་སྒྲུབ་ཕུག་བྱིན་ཅན་འཛམ་གླིང་གི་གནས་ཀྱི་སྙིང་པོར་གྱུར་པ་ལྟ་བུ་དེ་ཡིན་ཞིང་།      འོག་ནས་འཆད་འགྱུར་ལྟར་ཕྱིས་རླངས་ཆེན་དཔལ་གྱི་སེང་གེ་ཕུག་པ་འདིར་བཞུགས་ནས་སྒྲུབ་པ་མཛད་པས་དཔལ་ཕུག་ཅེས་བཏག་འདུག     དཔལ་ཕུག་གི་ཕུག་པ་དངོས་ཀྱི་སྒོ་ནི་ཟངས་གཟེར་གྱིས་གྲུབ་པའི་སྒོ་གླེགས་སྟག་སྤགས་ཀྱི་དབྱིབས་ཅན་ཞིག་གིས་བཅད་ཡོད་པས་ནང་དུ་གང་བྱུང་འགྲོ་ས་མེད་ཀྱང་།      སྒོ་གླེགས་ཀྱི་བར་ནས་ཡར་གློག་གཞུ་བཀར་ན་ནང་ཡོངས་རྫོགས་མཇལ་ཐུབ།     ཕྱི་ན་སྒོ་ཁང་ཆུང་ངུ་ཞིག་ཡོད་པ་དེར་སྨོན་ལམ་འདྲ་བཏོན་ནས་སྡོད་ཆོག་པ་དང་།     སྒོ་ཁང་དུ་ཡོད་པའི་རྟེན་གཙོ་གུ་རུ་རྡོ་རྗེ་གྲོ་ལོད་ཀྱི་སྐུ་འབྱོན་ལེགས་པ་དེ་ནི་བྱ་བྲལ་སངས་རྒྱལ་རྡོ་རྗེས་བཞེངས་པ་ཡིན།
     གུ་རུ་གསུང་འབྱོན་གྱི་ལྷ་ཁང་དུ་རྟེན་གཙོ་གུ་རུ་རིན་པོ་ཆེ་ཤིན་ཏུ་འབྱོན་ལེགས་པ་དང་།
      ཀུན་ར་ལྷ་ཁང་དུ་རྟེན་གཙོ་གུ་རུ་མཚོ་སྐྱེས་རྡོ་རྗེ་དང་འཁོར་མཁའ་འགྲོ་རྣམ་གཉིས་སོགས་བཞུགས་ཤིང་།     ལྷ་ཁང་འདི་སྒྲུབ་མཆོད་སོགས་ཀྱི་སྐབས་གྲྭ་བ་རྣམས་གཟིམ་ས་ཡིན་པས་ཀུན་ར་ལྷ་ཁང་ཞུ།   
     སྨོན་ལམ་གང་བཏབ་འགྲུབ་པའི་ལྷ་ཁང་ནི་རླངས་ཆེན་དཔལ་གྱི་སེང་གེའི་སྐུ་གདུང་མཆོད་རྟེན་ཡིན་ལ།     སྐུ་གདུང་གི་མདུན་དུ་རྡོ་རྗེ་ཕག་མོའི་དབུ་བྱིན་རླབས་ཅན་རང་བྱོན་དང་།     མཆོད་རྟེན་གྱི་རྒྱབ་ཏུ་རང་བྱུང་གི་སྒྲུབ་ཆུ་བཞུགས།      སྒྲུབ་ཆུ་འདི་མཚམས་ལན་རེར་སྐམ་པ་ལྟ་བུར་ཡོད་ཀྱང་གནས་བསང་དང་གནས་ཁྲུས་སོགས་ཀྱི་སྐབས་སུ་སླར་འབབ་པས་བྱིན་རླབས་ཆེ་གྲགས།    སྐུ་གདུང་མཆོད་རྟེན་འདིའི་ལོ་རྒྱུས་ནི།     ཡར་རྗེ་ཨོ་རྒྱན་གླིང་པའི་གཏེར་བྱོན་བཀའ་འདུས་རིག་འཛིན་བརྒྱུད་པའི་གསོལ་འདེབས་འབྲིང་པོ་ལས།
སྤ་གྲོ་སྟག་ཚང་སེང་གེའི་ཕུག་པ་རུ༔   
དཔལ་གྱི་སེང་གེ་ལ་བྱིད་ཡེ་ཤེས་བརྩེགས༔
དྲེགས་པ་ཀུན་འདུལ་ལྷ་ཚོགས་ཞལ་གཟིགས་ཤིང་༔
ལྷ་སྲིན་བཀའ་ཉན་གཞན་སྣང་མངོན་དུ་གྱུར་ཞེས་དང་།    འཇམ་མགོན་མི་ཕམ་རིན་པོ་ཆེས་སྒྲུབ་གནས་དཀར་མོ་སྟག་ཚང་དུ་མཛད་པའི་བོད་ཡུལ་གྲུབ་ཆེན་བརྒྱད་ཀྱི་གསོལ་འདེབས་བྱིན་རླབས་སྤྲིན་ཆེན་ལས།    
སྤ་གྲོ་སྟག་ཚང་བསམ་འགྲུབ་ཀེའུ་ཚང་དུ།།  
འཇིག་རྟེན་མཆོད་བསྟོད་དཀྱིལ་འཁོར་ལེགས་གྲུབ་སྟེ།།
ལྷ་སྲིན་དྲེགས་པ་བྲན་འཁོལ་ལས་བཞི་བསྒྲུབས།།  
དཔལ་གྱི་སེང་གེའི་ཞབས་ལ་གསོལ་བ་འདེབས་ཞེས་གསུངས་པ་ལྟར།     སྔོན་གུ་རུའི་ཐུགས་སྲས་རླངས་ཆེན་དཔལ་གྱི་སེང་གེས་གནས་འདིར་སྒོམ་སྒྲུབ་མཛད་ནས་གྲུབ་པ་བརྙེས་པའི་རྗེས་སུ་བལ་ཡུལ་དུ་ཕེབས་ཤིང་།   བལ་ཡུལ་ཡང་ལེ་ཤོད་ནས་སྐུ་མྱ་ངན་ལས་འདས་པའི་ཚེ།     སྐུ་གདུང་རྡོ་རྗེ་ལེགས་པས་གདན་དྲངས་ཡང་ཟེར།     གནས་བདག་སེང་གེ་བསམ་འགྲུབ་ཀྱིས་གདན་དྲངས་ཡང་ཟེར་ཏེ།    གང་ལྟར་སྐུ་གདུང་གཞི་བདག་གིས་གནས་འདིར་གདན་དྲངས་པ་ད་ལྟ་ཀུན་གྱི་མཇལ་དུ་ཡོད་པའི་མཆོད་རྟེན་འདིའི་ནང་བཞུགས་པ་ཡིན།    
འདིར་ངོ་མཚར་བའི་གཏམ་རྒྱུད་ཅིག་བྱུང་བ་ནི།     ཕྱི་ལོ་༢༠༡༡ལོར་ཁོ་བོ་གནས་འདིར་མཇལ་དུ་ཡོང་སྐབས་སྐུ་གདུང་མཆོད་རྟེན་འདི་དཀར་པོ་རང་དུ་མཇལ་ཞིང་།   ད་དུང་རྒྱུ་ཆ་ངན་ངོན་ཅན་གྱི་དཀར་རྩི་བགོས་ཡོད་ཀྱང་གས་སྲུབ་སོགས་ཀྱང་ཅུང་ཡོད་པ་དང་།     བཟོ་དབྱིབས་ཧ་ཅང་རྙིང་པ་ཡིན་ཞིང་བཟོ་སྒྲོས་ཀྱང་དེ་ཙམ་ལེགས་རྒྱུ་མེད་པས་མཆོད་རྟེན་ཤིན་ཏུ་རྙིང་པ་ཞིག་ཏུ་སྣང་།      ཡིན་ཡང་༢༠༡༤ལོར་འདིར་འབྱོར་སྐབས་མཆོད་རྟེན་གྱི་བཟོ་དབྱིབས་ཤིན་ཏུ་ལེགས་པར་མ་ཟད།     གཞི་དམར་པོ་དང་དེའི་ཐོག་ལ་གསེར་འབུར་གྱིས་བཟོས་པའི་པ་ཊ་དང་མེ་ཏོག    སེང་ཁྲིའི་ངོས་ལ་ཕྱོགས་སོ་སོར་གསེར་གྱི་སེང་གེའི་འབུར་གཟུགས་སོགས་དུས་རབས་གསར་བའི་དཔལ་འབྱོར་དང་ལག་ཤེས་ཀྱི་རྒྱུ་རྩལ་དགའ་རབ་མངོན་པས།      ངས་དཀོར་གཉེར་ལ།    འདི་ལ་གསར་དུ་བཟོ་བཅོས་བྱས་འདུག་ག་ཞེས་བཤད་ཅིང་།     དེའི་རྐྱེན་གྱིས་ཕར་བཤད་ཚུར་བཤད་འགའ་རེ་བྱས་ཀྱང་།      དཀོན་གཉེར་གཉིས་འདུག་པ་ཁ་གཅིག་གྲག་གིས།     མ་མཐའ་ཡང་ལོ་བཅུ་གྲངས་ཤིག་གི་ཡར་སྔོན་ནས་བཟུང་མཆོད་རྟེན་འདི་ལ་བཟོ་བཅོས་གང་ཡང་བྱས་ཡོད་མ་རེད་ཅེས་ཨུ་ཚུགས་མཐར་སྐྱེལ་བྱེད་ཀྱི་འདུག་ཀྱང་།     ངས་ཉི་མ་དཀར་དཀར་ལ་མཆོད་རྟེན་རྙིང་པ་དེར་དངོས་སུ་མཇལ་ཞིང་ལག་པས་རེག     སྐོར་བ་བྱས།    ཐོད་པ་གཏུགས་ཏེ་བྱིན་རླབས་ཞུས་པ་ཡིན་པས་ཁོང་གཉིས་ལ་བདེན་ཁ་སྟེར་ཐབས་མ་བྱུང་མོད།     ཕྱིར་ཨ་རིར་སླེབས་ནས་གནས་ཡིག་འདི་ཉིད་འབྲི་བའི་སྐབས་སུ་གདུང་སྲས་ཕྲིན་ལས་ནོར་བུ་རིན་པོ་ཆེས་མཛད་པའི་སྟག་ཚང་རྡོ་རྗེ་གྲོ་ལོད་ཀྱི་དཀར་ཆག་ལས།       དེ་མཚུངས་རླངས་ཆེན་དཔལ་གྱི་སེང་གེའི་སྐུ་གདུང་རླན་གཤེར་སོགས་ཀྱིས་ཉམས་ཆག་ཅི་ཆེར་གྱུར་ཡོད་པའི་ཁར།     སྐུ་གདུང་མཆོད་རྟེན་ཐིག་ཚད་ཇི་བཞིན་མི་ལྡན་པ་སོགས་ཐུགས་ཀྱིས་མ་བཟོད་པར་ས་གནས་གཞུང་དུ་སྙན་སྒྲོན་སྦྱར་ཏེ་མཆོད་རྟེན་དབྱིབས་བཟོ་ཚད་ལྡན་ལ།     པ་ཊ་དང་དང་རྒྱལ་ཆེན་བཞི་སོགས་རི་མོར་བཀོད་ཅིང་།      སྔར་ཡོད་ཉི་ཟླའི་ཏོག་ལ་སྐྱིད་བློན་ནས་གནང་བའི་གསེར་ཟངས་ཀྱི་ཆོས་འཁོར་བཅུ་གསུམ་གསར་དུ་བསྐྲུན་ཅིང་།     ཆར་ཆུའི་འཇིགས་པ་མི་འབྱུང་བའི་ཆེད་དུ་ཡ་ཕུབ་དང་།     རྒྱབ་ངོས་ནས་རྒྱ་གར་ཨར་ས་སི་མན་ཀྲིས་ཞལ་བ་ཞིབ་ཚགས་དང་ཞེས་སོགས།     ཕྱི་ལོ་༡༩༧༠སྟག་ཚང་དུ་རྡོ་རྗེ་གྲོ་ལོད་ཀྱི་སྐུ་འདྲ་གསར་བཞེངས་ཞུས་པ་དང་དུས་མཚུངས་སུ།      ད་ལྟ་མཇལ་དུ་ཡོད་པའི་མཆོད་རྟེན་འདི་ཉིད་འདི་ལྟར་ཉམས་གསོ་བྱས་ཚུལ་གསུངས་འདུག་པས་གོང་གི་དཀོར་གཉེར་གཉིས་ཀ་བདེན་པར་བྱུང་པ་དང་།   ཁོ་བོས་ནི་ཕྱི་ལོ་༢༠༡༡ལོར་སྔར་གྱི་མཆོད་རྟེན་རྙིང་པ་དེ་ཀ་རང་མཇལ་བ་ཡིན་འདུག་པས།     མཆོད་རྟེན་འདི་ལ་མཐོང་སྣང་སྣ་ཚོགས་ཡོང་རྒྱུ་ཡོད་པ་མིག་མཐོང་ལག་ཟིན་གྱིས་གྲུབ་པ་བྱུང་།    
    གུ་རུ་རྡོ་རྗེ་གྲོ་ལོད་ཀྱི་ལྷ་ཁང་དུ་གཡས་ནས་རིམ་བཞིན་བླ་མ་དགོངས་པ་འདུས་པ་དང་།     གུ་རུ་མཚོ་སྐྱེས་རྡོ་རྗེ།      ཚེ་དཔག་མེད།    གུ་རུ་རྡོ་རྗེ་གྲོ་ལོད།     རྡོ་རྗེ་ཕུར་པ་ཡབ་ཡུལ་རྣམས་ཀྱི་སྐུ་བརྙན་ཆེ་ཞིང་ལེགས་པ་དང་།     གུ་རུ་མཚོ་སྐྱེས་རྡོ་རྗེའི་ཁྲི་རྒྱབ་ཀྱི་ནོར་བུ་པ་ཊའི་ནང་གུ་རུ་མཚན་བརྒྱད་ཀྱི་སྐུ་བལྟ་ན་སྡུག་པ་དག་བཞུགས་ཤིང་།       རྡོ་རྗེ་གྲོ་ལོད་ཀྱི་སྐུ་འདྲ་འདི་ནི་རབ་བྱུང་བཅུ་དྲུག་པའི་ལྕགས་ཁྱི་ཕྱི་ལོ་༡༩༧༠ལོར་ཕྱོགས་གང་སར་འབྱུང་བའི་འཇིགས་པ་སོགས་སྣོད་བཅུད་ཀུན་ལ་བཀྲ་མི་ཤིས་པའི་མཚན་མ་མང་དུ་བྱུང་སྐབས།      སྣོད་བཅུད་ཀྱི་རྒུད་པ་གསོ་བ་དང་།     འབྲུག་གི་བསྟན་སྲིད་སྤྱི་ལ་སྨན་པའི་ཞབས་རིམ་ཅི་དགོས་༧སྐྱབས་རྗེ་བདུད་འཇོམས་རིན་པོ་ཆེ་ལ་ཐུགས་བརྟག་ཞུས་པར།     བདུད་འཇོམས་རིན་པོ་ཆེས།     སེང་གེ་རྫོང་དུ་རྡོ་རྗེ་ཕུར་པ་དང་།     སྐུ་རྗེས་ལྷ་ཁང་དུ་གུ་རུ་སྣང་སྲིད་ཟིལ་གནོན།     སྤ་གྲོ་སྟག་ཚང་དུ་རྡོ་རྗེ་གྲོ་ལོད་ཀྱི་སྐུ་བརྙན་རྣམས་ལ་སོ་སོའི་སྐུ་བརྙན་འབུམ་ཕྲག་རེའི་ཟུང་འཇུག་དང་བཅས་བཞེངས་ན་དུས་ཀྱི་རྒུད་པ་ཟློག་པའི་བཀའ་ཕེབས་པ་བཞིན།      འཇམ་མགོན་མི་ཕམ་རིན་པོ་ཆེའི་ཐུགས་སྲས་གྲུབ་དབང་ཤཱཀྱ་ཤྲཱིའི་དངོས་སློབ་བླ་མ་བསོད་ནམས་བཟང་པོས་རྟེན་བཞེངས་ཀྱི་དོ་དམ་མཛད་ནས་བཞེངས་པ་ཡིན་ཞིང་།      ཟུང་འཇུག་ལ་ཡེ་ཤེས་སེམས་དཔའི་རྟེན་དུ་རྒྱལ་ཡུམ་ཆེན་མོ་ཕུན་ཚོགས་ཆོས་སྒྲོན་གྱིས་གནང་བའི་གནམ་ལྕགས་ཀྱི་གཏེར་ཕུར་དང་།   གྲོ་ལོད་སྐུ་བརྙན་འབུམ་ཕྲག     རིང་བསྲེལ་རྣམ་པ་བཞི་སོགས་བྱིན་རླབས་ཀྱི་ཚན་ཁ་འབར་བ་མང་དུ་བཞུགས་ཡོད་འདུག     
ཚེ་དཔག་མེད་ཀྱི་གཡས་ཕྱོགས་སུ་བཞུགས་པའི་གུ་རུ་མཚོ་སྐྱེས་རྡོ་རྗེའི་སྐུ་བརྙན་ཤིན་ཏུ་འབྱོན་ལེགས་པ།     ད་ལྟ་རང་གསུང་འབྱོན་ནམ་སྙམ་པ་ཞིག་འདུག་པ་དེ་ནི།     ཁོ་བོའི་བྲིས་པའི་སྤྲིན་གྱི་རྒྱ་མཚོ་བརྒལ་བའི་བརྩེ་དུང་དུ་གསལ་བ་བཞིན།     ཕྱི་ལོ་༢༠༡༡ཟླ་༤པའི་ཚེས་༡༨ཉིན།    སྙིགས་མའི་མར་གཤམ་དུ་སྐྱེས་པའི་གུ་རུའི་ཆོས་བརྒྱུད་འཛིན་པ་ཞིག་གནས་འདིར་སླེབས་ཏེ།    ཕ་གཅིག་ཐུགས་རྗེའི་གཏེར་ཆེན་དེ་ཉིད་རྗེས་སུ་དྲན་པའི་གདུང་ཡུས་དང་བཅས།    རབ་ཏུ་དམའ་བའི་ས་ལ་གུས་པས་བསྡད་ནས་ཚིག་བདུན་གསོལ་འདེབས་ཀྱི་བླ་མའི་རྣལ་འབྱོར་བཏོན་སྐབས།     གུ་རུ་རིན་པོ་ཆེ་དང་ཐུགས་ཡིད་དབྱེར་མེད་དུ་འདྲེས་ཏེ་བརྒྱུད་གསུམ་རིག་འཛིན་བླ་མའི་དོན་བརྒྱུད་ཀྱི་རྟོགས་པ་སྙིང་ལ་འཕོས་པའི་སྐུ་བརྙན་བྱིན་ཅན་དེ་ཡིན་སྟབས།      མ་འོངས་པར་ཁོ་བོའི་སློབ་བརྒྱུད་འཛིན་པ་རྣམས་ཀྱིས་ནི།      སྐུ་བརྙན་འདི་ཉིད་རང་རེའི་མེས་པོ་སློབ་དཔོན་སྣ་ཚོགས་གཟུགས་ཅན་གུ་རུས་རྗེས་སུ་བཟུང་བའི་སྐུ་བརྙན་ཡིན་ཞེས་གཞན་ལ་ངོ་སྤྲོད་བྱེད་ཆོག་པར་ཡོད་དོ༎     
    གནས་ཁང་ནི་གནས་བདག་སེང་གེ་བསམ་འགྲུབ་ཀྱི་ལྷ་ཁང་ཡིན་ཞིང་།      ལྷ་ཁང་སྟེང་འོག་གཉིས་ཀྱི་སྟེང་མ་ལ་གུ་རུ་རིན་པོ་ཆེ་དང་།     སྟོན་པ་བཅོམ་ལྡན་འདས།     རྡོ་རྗེ་སེམས་དཔའ་སོགས་ཀྱི་སྐུ་དང་།    འོག་མ་ལ་སེང་གེ་བསམ་འགྲུབ་ཀྱི་སྐུ་འདྲ་འབྱོན་ལེགས་བཞུགས།     གནས་བདག་སེང་གེ་བསམ་འགྲུབ་ནི་རྟ་སྔོན་པོ་ལ་བཅིབས་ཤིང་།    ཕྱག་གཡས་ན་མདུང་དར་དང་།    གཡོན་ན་ནོར་བུ་དང་ཞགས་པ་ཐུགས་ཀར་འཛིན་པ།    དབུ་ལ་པད་ཞྭ་མནབས་པ་ཞིག་ཏུ་འདུག་ཅིང་།     གསང་ཡུམ་མཚོ་སྨན་ནོར་བུ་རྒྱལ་མོ་ནི།    སྐུ་སྨད་སྦྲུལ་མཇུག་ཅན་དང་།   ཕྱག་གཡས་ན་མདའ་དར་དང་གཡོན་ན་ནོར་གཞོང་བསྣམས་པ།   སྐུ་སྨད་མཚོ་ནང་དུ་གནས་པ་ཞིག་བཞུགས།    གནས་ཁང་འདི་ལ་དམིགས་བསལ་གྱིས་རེ་བ་མ་ཞུས་པར་གང་བྱུང་དུ་སྒོ་མི་ཕྱེ་ཞིང་བུད་མེད་རྣམས་ནང་དུ་ཕེབས་མི་ཆོག་པར་འདུག    སྐབས་འདིར་དོན་གཉེར་ཅན་རྣམས་ཀྱིས་ཅིས་ཀྱང་ཤེས་དགོས་པ་ཞིག་ལ།    གསོལ་འདེབས་ལེའུ་བདུན་མའི་ནང་གི    སྟག་ཚང་སེང་གེ་བསམ་གྲུབ་ཀེའུ་ཚང་དུ་ཞེས་པའི་དོན་ཡང་།     སྤ་གྲོ་སྟག་ཚང་ཞེས་གནས་བདག་སེང་གེ་བསམ་གྲུབ་ཀྱིས་བདག་ཏུ་བཟུང་བའི་ཀེའུ་ཚང་ངམ་བྲག་ཕུག་ཏུ་ཞེས་པའི་དོན་ཡིན་པར་འདུག་སྟེ།   ཁོ་བོས་ཀྱང་འདིར་དངོས་སུ་མ་སླེབས་བར་དུ་དེའི་དོན་མ་རྟོགས་སོ༎
    ཚེ་དཔག་མེད་ཀྱི་ལྷ་ཁང་དུ་དཀྱིལ་ལ་ཚེ་དཔག་མེད་དང་།   གཡས་སུ་སྒྲོལ་མ།   གཡོན་དུ་གཙུག་དོར་རྣམ་རྒྱལ་མ་བཅས་ཚེ་ལྷ་རྣམ་གསུམ་སོགས་བཞུགས།   
    རྣམ་སྲས་ལྷ་ཁང་དུ་གཙོ་སྐུ་ལ་རྒྱལ་ཆེན་རྣམ་ཐོས་སྲས་དང་།    འཁོར་རྣམ་སྲས་རྟ་བདག་བརྒྱད།    ལྷ་ཁང་གི་གྱང་རིས་ལ་ཡང་ཨོ་རྒྱན་ནོར་ལྷ་དང་།    ཛཾ་ལྷ་རིགས་ལྔ་སོགས་ལྷ་ཁང་འདིར་ནོར་གྱི་ལྷ་ཚོགས་སྣ་ཚོགས་པ་བཞུགས།    
    གུ་རུ་མཚན་བརྒྱད་ཀྱི་ལྷ་ཁང་དུ་གུ་རུ་མཚན་བརྒྱད་དང་།  ཐུགས་རྗེ་ཆེན་པོ་བཅུ་གཅིག་ཞལ་ཆ་གཅིག    སངས་རྒྱས་ཚེ་དཔག་མེད།     སྟག་ཚང་གི་ལྷ་ཁང་ཐོག་མར་བཞེངས་མཁན་འབྲུག་གི་སྡེ་སྲིད་བཞི་པ་རྒྱལ་སྲས་བསྟན་འཛིན་རབ་རྒྱས་གྱི་སྐུ་འདྲ་སོགས་བཞུགས་ཤིང་།   འདིར་གནས་མཇལ་བ་རྣམས་ཀྱིས་དོ་གལ་བྱེད་དགོས་པ་ཞིག་ལ།   ལྷ་ཁང་འདིའི་ནང་གི་པང་གཅལ་གྱི་དཀྱིལ་ན་ཤིང་སྒོ་གྲུ་བཞི་མ་དར་གྱིས་བསྡམས་པ་ཞིག་ཡོད་པ།    ཆ་མེད་རྣམས་ཀྱིས་གང་ཡིན་མི་ཤེས་ཤིང་དོ་སྣང་ཡང་མི་བྱེད་པར་འགྲོ་ཡང་།     དཀོར་གཉེར་ལ་ཞུས་ནས་ཤིང་སྒོ་དེ་ཡར་བཀྱག་ན་དེའི་འོག་ཏུ་ས་དོང་གྲུ་གསུམ་གཏིང་ཟབ་མོ་འཇིགས་རུང་བལྟ་མི་བཟོད་པ་ཞིག་ཡོད་པ།     སྔོན་གུ་རུ་རིན་པོ་ཆེས་རྡོ་རྗེ་ཕུར་པ་བསྒྲུབས་པའི་གནས་ཡིན་ཟེར་ཞིང་།      གུ་རུས་སྟག་ཚང་སེང་གེར་ཕུར་པའི་སྒྲུབ་པ་མཛད་ཚུལ་ནི་གཏེར་ཁ་དུ་མ་ནས་ཀྱང་བྱུང་ངོ་༎
    མཚན་བརྒྱད་ལྷ་ཁང་གི་མདུན་དུ་ཕ་བོང་ཆེན་པོ་ཞིག་འདུག་པར་གུ་རུ་རིན་པོ་ཆེས་གཏེར་སྦས་ཡོད་པས་གཏེར་རྡོ་རུ་གྲགས་ཤིང་།   རྡོ་དེའི་ཐོག་ན་ཡེ་ཤེས་ཀྱི་སྤྱན་རང་བྱོན་ངོ་མཚར་བ་དང་།  གཏེར་སྒོ་ཡིན་ངེས་སྙམ་པའི་རྟགས་ཡ་མཚན་པ་ཞིག་ཀྱང་འདུག་ཅིང་།    དེ་མཚུངས་དཔལ་ཕུག་གི་གཡས་ཕྱོགས་སུ་ཡང་གཏེར་རྡོ་ངོ་མཚར་བ་ཞིག་བཞུགས།   
    སྟག་ཚང་གི་གཡས་ཕྱོགས་ཀྱི་བྲག་གཡང་མཐོན་པོ་དེ་ནི་སྔོན་གུ་རུ་རིན་པོ་ཆེས་མཁའ་འགྲོ་ཡེ་ཤེས་མཚོ་རྒྱལ་ལ་ཆོས་གནང་ས་ཡིན་ཞིང་།      གུ་རུའི་ཤེལ་དཀར་གྱི་ཕྱག་ཕྲེང་ཞིག་ཡེ་ཤེས་མཚོ་རྒྱལ་ལ་གནང་བ་ལས་གནས་དེར་ཤེལ་དཀར་གཟར་ཞེས་ཐོགས།      བྲག་གཡང་དེ་ལས་འབབ་པའི་ཆུ་བོ་དེ་མཁའ་འགྲོ་སྟོང་གི་སྒྲུབ་ཆུ་ཡིན་པས་བྱིན་རླབས་ཤིན་ཏུ་ཆེ་བར་གྲགས་ཤིང་།   སྔོན་གདུང་སྲས་ཕྲིན་ལས་ནོར་བུ་རིན་པོ་ཆེས་ཀྱང་དགོས་པ་ཁྱད་པར་ཅན་ལ་གཟིགས་ཏེ་སྒྲུབ་ཆུའི་མདུན་ནས་ཆོས་སྐུའི་གཟིགས་སྟངས་ཅན་གྱི་སྐུ་པར་བཀྱོན་ཡོད།     སྟག་ཚང་ལྷ་ཁང་ནས་བལྟས་ན་སྒྲུབ་ཆུ་འདི་བྲག་ནག་པོ་བྷ་གའི་དབྱིབས་ཅན་ཞིག་གི་ཁ་ནང་ནས་བརྒྱུད་དེ་འབབ་བཞིན་ཡོད་པས་མཁའ་འགྲོའི་སྒྲུབ་ཆུ་ཟེར་བ་སེམས་ལ་དྲན་ན་དགོད་ཤོར་བ་ཙམ་ཞིག་མཆིས།   
    ཡང་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པའི་ཡེ་ཤེས་མཚོ་རྒྱལ་ཀྱི་རྣམ་ཐར་བསྟོད་པ་ལས།    
སྤ་གྲོ་སྟག་ཚང་ཟབ་ལམ་བརྟུལ་ཞུགས་སྤྱོད༎    
སྒོ་གསུམ་བདེ་ཆེན་རྡོ་རྗེ་གསུམ་དུ་གྱུར༎    
བཅུ་དྲུག་ལང་ཚོས་སྒེག་པའི་གཟི་བྱིན་འབར༎     
དཔལ་མོ་ཧེ་རུ་ཀ་ལ་གསོལ་བ་འདེབས༎     ཞེས་གསུངས་པ་བཞིན་ཤེལ་དཀར་གཟར་གྱི་གཡོན་ཕྱོགས་སུ་གུ་རུ་རིན་པོ་ཆེ་དང་མཁའ་འགྲོ་ཡེ་ཤེས་མཚོ་རྒྱལ་གཉིས་ཀྱིས་སྒྲུབ་པ་མཛད་སའི་སྒྲུབ་ཕུག་ཆུང་ངུ་གཅིག་ཡོད་པ་དེ་ལ་སེང་གེ་ཕུག་ཅེས་ཟེར་ཞིང་།     ད་སྐབས་ལྷ་ཁང་ཆུང་ངུ་ཞིག་ཀྱང་ཡོད་པ་དང་རྡོ་རྐས་གཟར་པོ་ཞིག་ལ་འཛེགས་ནས་འགྲོ་དགོས།     རྡོ་སྐས་ཀྱི་འགྲམ་དུ་ལྕགས་ལེབ་ཀྱི་སྦྱར་བྱང་ཞིག་ལ་སེང་གེ་ཕུག་གི་ངོ་སྤྲོད་མདོར་བསྡུས་ཤིག་མཆིས་ཤིང་།   འབྲུག་པ་རྣམས་ཀྱིས་ནི་སེང་གེ་ཕུག་ལ་མཁའ་འགྲོ་ཡེ་ཤེས་མཚོ་རྒྱལ་གྱི་སྒྲུབ་ཕུག་ཅེས་འབོད་པར་སྣང་།     སེང་གེ་ཕུག་གི་ལྷ་ཁང་ནང་དུ་མཁའ་འགྲོའི་ཞབས་རྗེས་དང་།    ཚོན་སེར་པོས་རྟགས་བརྒྱབ་པའི་གཏེར་སྒོ་ངོ་མཚར་བ་ཞིག་ཀྱང་མཇལ་རྒྱུ་ཡོད་པས་གནས་འཇལ་བ་རྣམས་ཀྱིས་འདི་ཉིད་མཇལ་རྒྱུ་མ་ཆད་པ་བྱེད་དགོས།   
གཞན་ཡང་གནས་འདིར་ཕྱག་ཞབས་ཀྱི་རྗེས་དང་གཏེར་གནས་དུ་མ།    རང་བྱོན་སྣ་ཚོགས་དང་རྩ་ཆེ་བའི་སྨན་ཤིང་མེ་ཏོག་གི་རིགས།    དམ་པ་དུ་མའི་སྒྲུབ་གནས་དང་སྒྲུབ་ཆུ་སོགས་ཤིན་ཏུ་མང་བ་ཡོད་ངེས་སུ་འདུག་ཀྱང་རེ་ཞིག་འདི་ཙམ་ཞིག་ལས་འབྲི་བར་མ་སྤོབས་མོད།     སླད་ནས་མཁས་པ་གཞན་དག་དང་།    སྤ་གྲོའི་གནས་ལ་ས་རྒྱུས་ཆུ་རྒྱུས་ཆེ་བ་རྣམས་གྱིས་བྲིས་པའི་གནས་ཡིག་ལོ་རྒྱུས་འདྲ་རྙེད་ན་འདིར་ཁ་སྐོང་བར་བྱ་ཞིང་།     དེར་མ་ཟད་ཕྱིས་སུ་ཡང་གནས་མཆོག་འདི་མཇལ་བར་ཡང་ཡང་བསྐྱོད་རྩིས་ཡོད་པས།      རྗེས་ཀྱི་མཐོང་ཐོས་རྣམས་སླད་ནས་འབྲི་བར་བྱའོ༎
སྤྱིར་སྟག་ཚང་དཔལ་ཕུག་ཡོད་སའི་བྲག་རི་འདི་ཁྲོ་བོ་སྤྱན་གསུམ་པ།    ཞལ་གདངས་པ།   ཤངས་གཉེར་བ།    མཆེ་བ་གཙིགས་པ།   དབུ་སྐྲ་གཟེངས་པ་ཞིག་གི་དབྱིབས་ཇི་མ་ཇི་བཞིན་འདུག་པས་ཤིན་ཏུ་ངོ་མཚར་ཞིང་།    ཁྱད་པར་དཔལ་ཕུག་གི་སྒོ་ཁང་དུ་བཤམས་ཡོད་པའི་སྟག་ཚང་གི་གནས་ཀྱི་པར་རིས་རྙིང་པ་དེ་ལ་བལྟས་ན་རང་བྱུང་རང་ཤར་གྱིས་ཁྲོ་ཞལ་མངོན་སུམ་དུ་དོད་འདུག་པས།     ཁོ་བོས་ཀྱང་ཐོག་མར་པར་རིས་འདི་བཟོས་མ་ཞིག་ཡིན་ངེས་སྙམ་པ་བྱུང་མོད།    ཡ་མཚན་པ་ཞིག་ལ་ཁོ་བོ་རང་གིས་རྒྱང་རིང་པོ་ནས་བཏབ་པའི་པར་ཞིག་གི་ནང་དུ་ཁྲོ་ཞལ་དེ་ཀ་རང་བཅས་བཅོས་མེད་དོད་འདུག་པས།     སྟག་ཚང་གི་མདུན་ཀྱི་གཡོན་ཕྱོགས་གམ།    དེ་བས་ཀྱང་མདུན་ངོས་གཡོན་ཕྱོགས་ཀྱི་མཐོ་ས་ནས་བལྟས་ན་ཁྲོ་ཞལ་དེ་མངོན་སུམ་གྱི་མིག་ལ་མཐོང་ངེས་སུ་འདུག     འོན་ཀྱང་དེ་ལ་ཁྲོ་ཞལ་མི་ཟེར་བར་སེང་གེའི་གདོང་པ་ཟེར་དགོས་པ་འདྲ་སྟེ།    རྒྱལ་པོ་བཀའ་ཡི་ཐང་ཡིག་ལས།     དེ་ནས་ཡང་དག་བཤད་བྱ་བ༔    སྤ་གྲོ་རྫོང་གི་ཕུག་ན་བྲག་དཀར་པོ་སེང་གེ་གནམ་དུ་མཆོང་པ་འདྲ་བའི་སྡེར་མོ་གཡས་པ་ལ་ཞེས་སོགས་དང་།      བདུད་འཇོམས་གཏེར་བྱོན་ཡང་གསང་ཐུགས་ཀྱི་ཐིག་ལེའི་ལོ་རྒྱུས་ལས།    
རྒྱས་པ་བདེ་གཤེགས་ཡོངས་འདུས་སྐོར༔    
སྐུ་ཚབ་ཡིད་བཞིན་དཔལ་འབར་དང་༔    
མྱོང་གྲོལ་བདེ་ཆེན་རིལ་བུ་བཅས༔    
མོན་གྱི་སྟག་ཚང་དཔལ་ཕུག་གི༔    
སྒོ་གདོང་སེང་གེ་འདྲ་བའི་མགུལ༔    
རྡོ་རྗེའི་ཀེའུ་ཚང་སུལ་དུ་གཏམས་ཞེས་གསུངས་ཤིང་།   གཏེར་ཁ་གཞན་ལས་ཀྱང་སྤ་གྲོའི་ལུང་པའི་ཕུག་ན་བྲག་དཀར་པོ་སེང་གེ་གནམ་དུ་མཆོངས་པ་འདྲ་བ་ཞེས་བྱུང་ངོ་༎
དེ་ལྟར་གུ་རུའི་སྒྲུབ་གནས་དང་གཏེར་གནས་ཀུན་གྱི་རྒྱལ་པོ་ལྟ་བུ་ངོ་མཚར་རྨད་དུ་བྱུང་བའི་གནས་མཆོག་འདིར།     སྔོན་ནས་ད་བར་ཆོས་མེད་ཀྱི་ཀླ་ཀློ་དང་།    དམག་དཔུང་གིས་ལམ་སྣེ་ཁྲིད་པའི་གྲུབ་མཐའ་གསར་སྤེལ་གང་གིས་ཀྱང་དབང་བསྒྱུར་མ་ཐུབ་པའི་དྲིན་གྱིས།    གོང་དུ་སྨྲོས་ཟིན་ལྟར་ཐོག་མར་སློབ་དཔོན་རིན་པོ་ཆེ་དང་།     མཁའ་འགྲོ་ཡེ་ཤེས་མཚོ་རྒྱལ།    མོན་མོ་བཀྲ་ཤིས་ཁྱེའུ་འདྲེན་བཅས་གུ་རུ་ཡབ་ཡུམ་རྣམས་ཀྱི་ཞབས་ཀྱིས་བཅགས་ཤིང་།      སློབ་དཔོན་ཆེན་པོས་བདུད་འདུལ་གུ་རུ་དྲག་པོ་རྡོ་རྗེ་གྲོ་ལོད་ཀྱི་སྐུར་བཞེངས་ཏེ་མོན་བོད་ཀྱི་ལྷ་སྲིན་ཐམས་ཅད་དམ་འོག་ཏུ་བཅུག      རྩ་བའི་གནས་དང་ཉེ་བའི་གནས་རྣམས་སུ་གཏེར་ཁ་དཔག་ཏུ་མེད་པ་སྦས།     མ་འོངས་པར་གནས་ཀྱིས་གང་ཟག་བྱིན་གྱིས་རློབ་ནུས་པའི་རྡོ་རྗེའི་གནས་ཆེན་དུ་བྱིན་གྱིས་བརླབས་པ་ནས་བཟུང་།      གུ་རུའི་སློབ་བརྒྱུད་དང་ཆོས་བརྒྱུད་འཛིན་པའི་མཁས་པའི་དབང་པོ།      གྲུབ་པའི་ཁྱུ་མཆོག     ཟབ་པ་ས་གཏེར་དང་རྒྱས་པ་དགོངས་གཏེར་གྱི་བདག་པོ་རྣམས།     གུ་ཡངས་བག་ཕེབས་ཀྱི་ངང་གནས་འདིར་བར་མ་ཆད་དུ་བྱོན་པས།    ཤིན་ཏུ་བཀྲ་ཤིས་ཤིང་བྱིན་ཆགས་པའི་གནས་འདིར་ནི་ད་ལྟའི་བར་དུ་མཁས་གྲུབ་གསེར་རིའི་ཕྲེང་བ་དག་གི་ཞབས་རྗེས་ཀྱི་རི་མོའི་རྒྱུན་ཆད་མ་མྱོང་བ་ཡིན་ནོ༎                
དེ་ཡང་གུ་རུའི་ཐུགས་སྲས་རྗེ་འབངས་ཉེར་ལྔའི་ནང་ཚན་རླངས་ཆེན་དཔལ་གྱི་སེང་གེ་གནས་འདིར་བྱོན་ནས་གྲུབ་པ་བརྙེས་པའི་ཚུལ་སོགས་ནི་གོང་ཏུ་མདོ་ཙམ་སྨྲོས་ཟིན་ཅིང་།     གཞན་ཡང་སྔོན་དང་ད་ལྟའི་གཏེར་སྟོན་ཆེན་པོ་རྣམས་དང་།   དམ་པ་དུ་མས་གནས་མཆོག་འདི་ནས་ཟབ་གཏེར་བཞེས་ཚུལ་དང་།      སྒྲུབ་པ་མཛད་ཚུལ་འགའ་ཞིག་ཕྱོགས་ཙམ་བརྗོད་ན།    
ཐང་ཡིག་ལས།   
དེ་ཉིད་མི་གནས་མྱ་ངན་འདས་འོག་ཏུ༔   
ཡར་འབྲོག་མཚོ་གླིང་དགུ་ལ་དམར་སྒར་འབྱུང་༔        
སྟག་ཚང་ནང་དུ་གཙང་པ་གསུམ་གཉིས་འཆི༔    
རྩིས་ཀྱི་ལྷ་ཁང་སྦས་པའི་གཏེར་ཁ་འདི༔    
མི་བཞག་འདོན་པའི་རྟགས་དེར་བསྟན་ནས་བྱུང་༔  
ཨོ་རྒྱན་བསྟན་གཉིས་གླིང་པ་ཞེས་བྱ་འབྱུང་ཞེས་གསུངས་པའི་ཨོ་རྒྱན་བསྟན་གཉིས་གླིང་པའམ་པདྨ་ཚེ་དབང་རྒྱལ་པོས་སྤ་གྲོ་སྟག་ཚང་ནས་ཟབ་གཏེར་བཞེས་ཚུལ་ནི།     གུ་རུ་བཀྲ་ཤིས་ཀྱི་ཆོས་འབྱུང་ཆེན་མོའི་བསྟན་གཉིས་གླིང་པའི་རྣམ་ཐར་ལས།    སྤ་གྲོ་སྟག་ཚང་ནས་སྔོན་གཏེར་སྟོན་ཚེ་བརྟན་རྒྱལ་མཚན་གྱིས་ཡང་གཏེར་དུ་སྦས་པའི་ཤོག་སེར་ལ་ལ་ཤོག་དྲིལ་དང་།  ལ་ལ་པུསྟིར་ཡོད་པ་འགའ་གདན་དྲངས་ཞེས་དང་།   
དེ་བཞིན་གཏེར་སྟོན་སར་བན་ཕྱོགས་མེད་ཀྱིས་སྤ་གྲོ་ནས་གཏེར་བཞེས་ཚུལ་ཀྱང་གོང་གི་ཆོས་འབྱུང་ལས།       གཏེར་སྟོན་འདི་འཁྲུངས་ཡུལ་མོན་སྤ་གྲོ་བ་ཡིན།     འདིས་འཇམ་དཔལ་གྱི་ཆོས་སྐོར་ཆ་ལག་ཚང་བ་སྤ་གྲོ་སྟག་ཚང་ནས་གཏེར་བཞེས་ཏེ་དེང་སང་གི་བར་དུ་དར་རྒྱས་ཆེ་ཞེས་གསུངས་ཏེ།     འདིའི་གཏེར་གཞུང་གི་རྩ་བ་དངོས་ད་བར་མ་མཇལ་ཡང་།    འཇམ་དཔལ་རྫོགས་པ་ཆེན་པོའི་ཕྲིན་ལས་དང་སྨིན་བྱེད་ཀྱི་ཆོག་བསྒྲིགས་སྣང་སྟོང་འོད་ལྔའི་རྒྱ་ཅན་གོང་ས་ལྔ་པ་ཆེན་པོས་མཛད་པ་ད་སྐབས་རིན་ཆེན་གཏེར་མཛོད་དུ་བཞུགས།   
ཡང་གོང་གི་ཆོས་འབྱུང་ལས།    མངའ་བདག་མོན་མི་འཁྱིལ་ནི།      ལྷོ་རྒྱུད་དུ་བྱོན།      སྤ་གྲོ་སྟག་ཚང་ནས་རྟ་མགྲིན་དཔའ་བོ་གཅིག་སྒྲུབ་ཀྱི་སྐོར་དང་།    རྒྱལ་པོ་སྲོག་གི་འཁོར་ལོ།     པེ་དཀར་རང་གནད་འབེབས་པའི་གདམས་པ་དང་།    དྲེགས་པ་གནད་ལ་འབེབས་པའི་གདམས་སྐོར་རྣམས་སྤྱན་དྲངས་ཞེས་གསུངས་ཏེ།     འདིའི་རྟ་མགྲིན་དཔའ་བོ་གཅིག་པའི་མན་ངག་དང་།    རྒྱལ་པོ་སྲོག་གི་འཁོར་ལོའི་ལག་ལེན་གྱི་རིམ་པ་བཅས་ཀུན་གཟིགས་མཁྱེན་བརྩེའི་དབང་པོའི་ཉེ་བརྒྱུད་ཅན་ད་ལྟ་རིན་ཆེན་གཏེར་མཛོད་དུ་བཞུགས།  
        དེ་བཞིན་པདྨ་གླིང་པའི་ཐུགས་སྲས་འགྲོ་འདུལ་ལས་འཕྲོ་གླིང་པས་ཀྱང་སྤ་གྲོ་ནས་ཟབ་གཏེར་བཞེས་མང་དུ་བཞེས་ཤིང་།      
གྲུབ་ཆེན་ཐང་སྟོང་རྒྱལ་པོས་ཀྱང་སྤ་གྲོ་སྟག་ཚང་དུ་བྱོན་ནས་སྒྲུབ་པ་མཛད་པ་དང་ཟབ་གཏེར་བཞེས་པའི་ཚུལ་ནི།    ལ་སྟོད་བྱང་པ་ཤེས་རབ་དཔལ་ལྡན་གྱིས་མཛད་པའི་ཐང་རྒྱལ་རྣམ་ཐར་རྗེ་གྲུབ་ཐོབ་ཆེན་པོ་ལྕགས་ཟམ་པའི་རྣམ་པར་ཐར་བ་ངོ་མཚར་རྒྱ་མཚོ་ལས།  ལྷོ་ཕྱོགས་མོན་ཀྱི་པ་གྲོ་༼ སྤ་གྲོ་ ༽ལ་བྱོན།    མོན་ཡུལ་ནམ་མཁའ་རྫོང་དང་།    སྟག་ཚང་སེང་གེ་བསམ་འགྲུབ་ཀེའུ་ཚང་།   དུར་ཁྲོད་རྔམ་པ་སྒྲ་སྒྲོག་ཅེས་བྱ་བ།     ཆུ་རྔམ་སྐད་འབྱིན་ཅིང་།    བྱ་རྣམས་ཧཱུྂ་སྐད་སྒྲོག་པ་དེར།     ཤིང་སྡོང་གི་ཕུག་པར།   ཉིན་མོ་མི་རྣམས་ཚོགས་འཁོར་ལ་འདུས་པས་སྟོང་ཕྲག་དུ་མ་འདུས་པས་ཤོང་།   གཅིག་ལས་མེད་ཀྱང་ཉམས་དགའ།   མཚན་མོ་རེ་དང་།   འདྲེ་སྲིན་མང་པོ་འདུ་བ་དེར་ཞག་ལྔ་བཞུགས།     འབྱུང་པོ་རྣམས་པ་ཆོས་འབྲེལ་མཛད།    བཀའ་བཞིན་སྒྲུབ་པར་ཁས་བླངས་ཞེས་དང་།    མོན་པ་བདེ་བ་བཟང་པོས་མཛད་པའི་བླ་མ་ཐང་སྟོང་རྒྱལ་པོའི་རྣམ་ཐར་གསལ་བའི་སྒྲོན་མེའི་ལེའུ་རེ་གཅིག་པ་ལས།    གྲུབ་ཐོབ་ཆེན་པོ་དཔོན་སློབ་རྣམས་ཀྱིས་མོན་སྤ་གྲོ་ལ་བྱོན།     ཨུ་རྒྱན་པདྨ་འབྱུང་གནས་ཀྱི་སྒྲུབ་གནས།     སྟག་ཚང་སེང་གེ་བསམ་འགྲུབ་ཏུ་བཞུགས།    ཕུར་པའི་སྒྲུབ་མཆོད་མཛད།     དཔལ་རྡོ་རྗེ་གཞོན་ནུས་གཙོ་བོ་མཛད་སྒྲུབ་པ་བཀའ་བརྒྱད་ཀྱི་ལྷ་ཚོགས་ཞལ་གཟིགས།    སྟག་ཚང་ཉི་ཟླ་ཟུང་འབྲེལ་གྱི་གནས་བདག    ཀླུ་བདུད་མགོ་དགུ་དེ་ན་རེ།      གྲུབ་ཐོབ་ཆེན་པོ་ལགས།  ཁྱད་པར་གྱི་ཆོས་སྐལ་ཨུ་རྒྱན་ཆེན་པོས་བཞག་ཡོད་པ་ཆོས་གཏེར་ཟབ་མོ་འདོན་པར་ཞུ་ཟེར་བ་དང་།     སྟག་ཚང་གི་བྲག་ལོགས་དེ་ནས་ཆོས་གཏེར་ཤོག་རིལ་འདོམ་བཅུ་ཡོད་པའི་མན་ངག་འཕྲུལ་གྱི་ལྡེའུ་མིག     མདོ་སྔགས་ཐམས་ཅད་ཀྱི་ཟབ་དོན་རང་གི་ཆོས་སྐལ་དུ་འདུག་པ་དེ་གཏེར་ནས་བཏོན་པ་ཞེས་གསུངས་སོ༎   
གཞན་ཡང་བླ་མ་ཕ་ཇོ་འབྲུག་སྒོམ་ཞིག་པོ་ཡང་གནས་འདིར་ཕེབས་ནས་སྒྲུབ་པ་མཛད་པ་དང་།     དེ་རྗེས་ཞབས་དྲུང་ངག་དབང་རྣམ་རྒྱལ་མཆོག་པུ་ན་ཁ་རུ་བཞུགས་དུས་གནས་བདག་ཆོས་སྐྱོང་གིས་གདན་འདྲེན་ཞུས་པ་བཞིན་ཕྱི་ལོ་༡༦༤༥ ལོར་གནས་འདིར་ཕེབས་ཏེ་སྨོན་ལམ་དང་།     ཚེ་དཔག་མེད་ཀྱི་གསུངས་ཆོས་བདུན་ཕྲག་གཅིག་གི་རིང་གནང་བ་སོགས་ཀྱི་མཛད་ཕྲིན་བསྐྱངས་པ་ལས།    དེང་སང་གི་བར་འབྲུག་ཟླ་ ༥ པའི་ནང་བདུན་ཕྲག་གཅིག་གི་རིང་སྟག་ཚང་དུས་སྟོན་ཟེར་བ་གཞུང་གྲྭའི་གྲྭ་ཚང་གིས་སྤེལ་སྲོལ་ཡོད་འདུག
དུས་ཕྱིས་སུ་ཡང་།     སྙིགས་མའི་དུས་འདིར་ཨོ་རྒྱན་དངོས་སྣང་ཁྲག་འཐུང་བདུད་འཇོམས་གླིང་པའི་ཡང་སྲིད་༧སྐྱབས་རྗེ་བདུད་འཇོམས་རིན་པོ་ཆེ་འཇིགས་བྲལ་ཡེ་ཤེས་རྡོ་རྗེ་དང་།     ༧གོང་ས་རྒྱལ་མཆོག་བཅུ་བཞི་པ་ཆེན་པོའི་ཐུན་མོང་མ་ཡིན་པའི་རྩ་བའི་བླ་མ་དང་།    བཀའ་བབ་བདུན་ལྡན་འཇམ་དབྱངས་མཁྱེན་བརྩེའི་དབང་པོའི་ཡང་སྲིད་༧དིལ་མགོ་མཁྱེན་བརྩེ་རིན་པོ་ཆེ།      གཏེར་སྟོན་བསོད་རྒྱལ་ལས་རབ་གླིང་པའི་ཡང་སྲིད་༧ཆོས་རྗེ་མཁན་ཆེན་འཇིགས་མེད་ཕུན་ཚོགས་འབྱུང་གནས་རྣམས་ཀྱིས་ཀྱང་སྤ་གྲོ་སྟག་ཚང་ནས་ཟབ་གཏེར་གྱི་སྒོ་དུ་མ་ཕྱེས་པ་ཡིན་ཏེ།      
བདུད་འཇོམས་གཏེར་བྱོན་ཕུར་པ་སྤུ་གྲི་རེག་ཕུང་གི་རྩ་བ་ལས།    ཁོ་བོ་འཇིགས་བྲལ་ཡེ་ཤེས་རྡོ་རྗེ་རང་ལོ་སུམ་ཅུ་རྩ་བཞིར་སོན་པ་རབ་བྱུང་བཅུ་དྲུག་པའི་མེ་གླང་ཁྲུམ་སྟོད་ཀྱི་ཉ་བར་མོན་སྤ་གྲོ་སྟག་ཚང་སེང་གེ་ཕུག་ཏུ་ཕུར་པ་གནམ་ལྕགས་སྤུ་གྲིའི་སྒོ་ནས་བདུད་རྩི་སྨན་གྱི་སྒྲུབ་པ་བགྱིས་པའི་སྐབས་ཤིག     རྨི་ལམ་དུ་མཚོ་རྒྱལ་ཡིན་སྐད་བུ་མོ་རྒྱན་བཟང་མ་ཞིག་གིས་ལྕགས་ཀྱི་ཕུར་པ་མཐོ་གང་ཙམ་པ་ཤིན་ཏུ་སྒྲོས་གཙང་ཞིག་གཏད་ནས།     འདི་གུ་རུ་རིན་པོ་ཆེ་གནས་འདིར་རྡོ་རྗེ་གྲོ་ལོད་ཀྱི་སྐུར་བཞེངས་དུས་སྡེ་བརྒྱད་དམ་ལ་བཏག་ཅིང་རྒྱལ་བསེན་ཚར་གཅོད་བྱེད་ཀྱི་ཕྱག་མཚན་ངོ་མ་དེ་རེད།     ཕྱིས་གུང་ཐང་ལ་ཁར་ཕེབས་སྐྱེལ་གྱི་དུས་སུ་ཁོ་མོར་གནང་བ་ཡིན།     ད་ལམ་ཁྱེད་ལ་སྦྱིན་པ་ཡིན་གྱིས་སྙིང་ནོར་དུ་ཆོངས་ཞེས་རུམ་དུ་བཅུག་བྱུང་བར།    དགའ་ཆེས་པས་ཕྱག་ནས་བཙན་ཐབས་སུ་འཕྲོག་སྟེ།   ཐོག་མར་དབང་ཞིག་ལེན་དགོས་སྙམ་སྤྱི་བོ་དང་མགྲིན་པར་གཏུགས།     སྙིང་ཁར་རེག་མ་ཐག་ཕྱག་མཚན་ཕུར་པ་དང་རང་ལུས་དབྱེར་མེད་དུ་འདྲེས་ནས་ཁོག་སྟོད་ད་ལྟའི་ལུས་འདི་རང་ལ་ཁོག་སྨད་ལྕགས་ཕུར་མེ་ཡི་ཚྭ་ཚྭ་འཕྲོ་བར་གྱུར་ཏེ།    ངག་ནས་ཀཱི་ལ་ཡ་སྒྲོགས་པས་ས་ཀུན་གཡོ་བ་སྙམ་བྱེད།   དེར་བུ་མོ་དེས།   འོ་དབང་དང་བྱིན་རླབས་དངོས་གནས་དེ་རེད།   རྒྱུད་ལུང་མན་ངག་གཅིག་དྲིལ་གྱི་གཏེར་མཛོད་དེ་ཡིན།    འདི་ཡལ་བར་མ་དོར་ན་དགོས་པ་ཆེན་པོ་ཡོད།    སྔོན་དུས་གུ་རུ་རིན་པོ་ཆེའི་དྲུང་ནས་དབང་དང་གདམས་ངག་བཀའ་རྫོགས་ལུང་རྫོགས་སུ་ཞུས་པ་ཨེ་དྲན་ཟེར་ཞིང་ལག་ནས་འཐེན་བྱུང་བས་གཉིད་སད།     དེ་འཕྲལ་སྔར་གྱི་བགས་ཆགས་མང་པོ་འལ་འོལ་དྲན་ཅིང་།    ཁྱད་པར་ཕུར་བའི་ཆོས་སྐོར་བཀྲ་ལམ་གྱིས་ཡིད་ངོར་གསལ་བ་བྱུང་སྟེ།    རིག་པའི་ཀློང་ནས་གང་བརྡོལ་བརྡ་ཐད་ཀར་བསྒྱུར་ན་གཏེར་སྟོན་གོང་མ་གཉིས་ཀྱི་ཆོས་སྐོར་ལས་ཀྱང་རྒྱས་ཤིང་།    མན་ངག་ཕྲིན་ལས་ལས་ཚོགས་ཀྱི་རིམ་པ་སྔར་མ་གྲགས་པའང་ཇི་སྙེད་ཅིག་སྣང་མོད་ཀྱི་ཞེས་སོགས་དང་།    
ཡང་བྱ་བྲལ་སངས་རྒྱས་རྡོ་རྗེས་བསྐུལ་ངོར་རྡོ་རྗེ་ཕུར་པ་སྤུ་གྲི་རེག་ཕུང་གི་དབང་ཆོག་ཕྲིན་ལས་བཅུད་ཐིག་རྗེ་ཉིད་ཀྱིས་མཛད་པ་ལས།     བིདྱཏྟོ་མ་ལ་འབུམ་སྡེའི་ཡང་སྙིང་དྲག་སྔགས་སྤུ་གྲིར་འབྲེལ་བ།     རྣོ་ལ་ཚན་ཆེ་བ།     སློབ་དཔོན་རྣམ་པ་གསུམ་གྱི་དགོངས་ཉམས་གཅིག་ཏུ་དྲིལ་ནས་ཁ་ཚང་དོན་འདྲིལ་དུ་གདམས་པ།    ཟབ་དོན་ཐུགས་ཀྱི་ཉིང་ཁུ་སྤུ་གྲི་རེག་ཕུང་གི་ཆོས་སྐོར་འདི་ཉིད་གཞན་གང་ལའང་མ་སྤེལ་བར།    ལྷོ་ནུབ་སྲིན་ཡུལ་དུ་ཕེབས་པའི་གཤེགས་སྐྱེལ་ལ་མཚོ་རྒྱལ་དཔོན་སློབ་གསུམ་བྱོན་པའི་སྐབས་སུ།    ཕུར་བའི་བཀའ་བབས་ཚེ་རབས་ཀྱི་ལས་ཅན།      གཏན་གྱི་གཟུངས་མར་དགོངས་ནས་སྐྱེལ་ལན་གྱི་ཚུལ་དུ་མཁར་ཆེན་བཟའ་ཁོ་ན་ལ་མནོག་ཆོས་གཅིག་བརྒྱུད་དུ་གནང་།      དེས་ཀྱང་ཆེས་ཆེར་སྙིགས་མའི་མཐར་ཐུག་པའི་གདུལ་བྱ་ལ་དགོངས་ཏེ་སུ་ལའང་མ་སྤེལ་བར་ལས་ཅན་སྨོན་ལམ་ལ་དབང་བའི་སྐྱེས་བུ་གཅིག་གི་སྙིང་ལ་བཀའ་རྒྱས་བཏབ་སྟེ་མི་སྣང་བར་སྦས་པ་ལས།      དེང་དུས་གུ་རུ་ཡབ་ཡུམ་གྱི་ཐུགས་རྗེ་འགོག་པ་མེད་པའི་མཐུ་ལས།    རིག་པ་འཛིན་པ་འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་རྨི་ལམ་དག་པའི་སྣང་ངོར་མཁའ་འགྲོ་མཚོ་རྒྱལ་མས་རྗེས་སུ་བཟུང་བའི་གསལ་སྣང་ལ་བརྟེན་ནས་ཟབ་མོ་དགོངས་པའི་གཏེར་ཁ་ཤུགས་འབྱུང་དུ་བརྡོལ་ཏེ་གཏན་ལ་ཕབ་པའི་ཟབ་ཆོས་ཏེ།     བཀའ་གཏེར་རྡོ་རྗེ་ཕུར་བའི་ལམ་སྲོལ་རིང་བརྒྱུད་ཀྱི་ཆུ་བོ་འདུས་པ།   ཉེ་བརྒྱུད་ཀྱི་དྲོད་ཚད་ལྡན་པ།      བཀའ་བབས་ཀྱི་བྱིན་རླབས་ཆེ་བ།    ཕྲིན་ལས་ཀྱི་ཚན་ཁ་འབར་བ།    རྟེན་འབྲེལ་གྱི་སརྒྷ་མ་ལོག་པ་འདི་ཉིད་ཞེས་སོགས་གསུངས་པ་དང་།    དེའི་སྐབས་ཀྱི་གཏེར་ཡུམ་ཡང་གདུང་སྲས་ཕྲིན་ལས་ནོར་བུ་རིན་པོ་ཆེའི་སྐྱེད་ཡུམ་མཁའ་འགྲོ་རིན་པོ་ཆེ་ཚེ་བརྟན་གཡུ་སྒྲོན་ཡིན་པར་གསུངས་སོ༎    
ཡང་གོང་དུ་གསལ་བ་ལྟར་བདུད་འཇོམས་རིན་པོ་ཆེ་དགུང་ལོ་སུམ་ཅུ་རྩ་བཞིའི་ཐོག     སྤ་གྲོ་སྐུ་ཕྱོགས་ཟེར་བས་སྦྱིན་བདག་མཛད་ནས་སྟག་ཚང་དུ་སྐུ་གོང་མའི་གཏེར་བྱོན་ཕུར་པ་གནམ་ལྕགས་སྤུ་གྲིའི་སྨན་སྒྲུབ་གནང་སྐབས་བདུད་རྩི་ཁོལ་པ་དང་།   གདུང་སྲས་རིན་པོ་ཆེ་དགུང་ལོ་དྲུག་ལོན་པ་དེས་ཕྱི་ལོག་ནས་མགྲོན་པོ་མང་པོ་སླེབས་སོང་ཞེས་འུར་མཛད་ཏེ་མི་རྣམས་ཕྱིར་ཐོན་དགོས་པ་གནང་ཞིང་།    དེར་སྐད་ཆ་དྲིས་པས་མགྲོན་པོ་རྣམས་ལམ་ནང་ནས་ཡོང་གིན་མི་འདུག    ནམ་མཁའི་ཁམས་ནས་མར་བབས་ཡོང་གིན་འདུག་ཅེས་ཡེ་ཤེས་ཀྱི་ལྷ་ཚོགས་དངོས་སུ་ཕེབས་པའི་གཟིགས་སྣང་བྱུང་བ་གྲགས་ཆེ་བར་ཡོད།    
གཞན་ཡང་བདུད་འཇོམས་གཏེར་བྱོན་ཡང་གསང་ཐུགས་ཀྱི་ཐིག་ལེའི་ལོ་རྒྱུས་ལས།   
ཀུན་གྱི་སྙིང་པོའི་ཞུན་ཐིག་ནི༔  
ཡང་གསང་འདུས་པ་རྩ་བའི་སྐོར༔   
ཐུགས་ཀྱི་ཐིག་ལེ་དྭངས་མའི་བཅུད༔    
ཕྱི་རོལ་དངོས་པོའི་ས་གཏེར་དུ༔    
སྦ་ཞིང་འཇོག་པར་བློས་མ་ཐོངས༔    
ང་སྤྲུལ་སྒྱུ་མའི་སྐྱེས་བུ་ཡི༔   
དགོངས་ཀློང་དབྱིངས་ཀྱི་སྒྲོམ་བུར་སྦས༔     
ཡེ་ཤེས་རིག་པའི་གཟུངས་སུ་གཏམས་ཞེས་གསུངས་པ་བཞིན།     བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་ཟབ་མོ་དགོངས་པའི་གཏེར་ལས་བྱོན་པ།     ཡང་གསང་ཐུགས་ཀྱི་ཐིག་ལེའི་རྡོ་རྗེ་གྲོ་ལོད་ཀྱི་ཆོས་སྐོར་རྣམས་ལ།       འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ་ཞེས་པ་ཙམ་ལས།     གནས་གང་དུ་དགོངས་པའི་གཏེར་ལས་ཕབ་པའི་གསལ་ཁ་མ་བྱུང་ཡང་།    དགོངས་གཏེར་དེ་དག་གཏན་ལ་ཕབ་པའི་གནས་ཀྱང་སྟག་ཚང་སེང་གེ་འདི་ཉིད་ཡིན་པར་རྒྱུས་ཡོད་ཀྱི་དམ་པ་རྣམས་གསུངས་ཤིང་།     ཕྱིས་སུ་བདུད་འཇོམས་རྣམ་ཐར་རྒྱས་པར་དེའི་སྐོར་བཞུགས་པ་མཇལ་ན་འདིར་འཛུད་པས་ཆོག་གོ།
དིལ་མགོ་མཁྱེན་བརྩེ་རིན་པོ་ཆེས་གནས་འདི་ནས་ཟབ་གཏེར་བཞེས་པའི་ཚུལ་ནི།     དིལ་མཁྱེན་དགོངས་གཏེར་རང་བྱུང་པདྨའི་སྙིང་ཐིག་གི་གུ་རུ་རྡོ་རྗེ་གྲོ་ལོད་ཀྱི་སྒྲུབ་ཐབས་གདུག་ཅན་མཐར་བྱེད་རྡོ་རྗེའི་གོ་ཆ་ལས།    
རྩ་རླུང་ཐིག་ལེའི་ལང་ཚོ་སྨིན་པ་ཡིས༎  
མགོ་སྐྱེས་ཙམ་པ་ཀ་ཡི་ཐོད་བཅིངས་པ༎     
པདྨ་གར་དབང་མདོ་སྔགས་གླིང་པའི་སྡེས༎    
རིག་རྩལ་ཡེ་ཤེས་ཆོས་གཏེར་སྤྲོ་བའི་གནས༎    
གངས་ཅན་སྐྱབས་གཅིག་མཚོ་སྐྱེས་རྒྱལ་བའི་དབང་༎    
འཆོལ་བའི་ཁྲོ་རྒྱལ་སྐུར་བཞེངས་རྡོ་རྗེའི་བྲག།   
སྟག་ཚང་སེང་གེ་བསམ་འགྲུབ་ཀེའུ་ཚང་ནས༎    
གཏན་ལ་ཕབ་འདིས་ཞེས་གསུངས་པ་དང་།      
ཆོས་རྗེ་མཁན་ཆེན་འཇིགས་མེད་ཕུན་ཚོགས་འབྱུང་གནས་ཀྱིས་སྟག་ཚང་ནས་ཟབ་གཏེར་བཞེས་ཚུལ་ཡང་།      དཔལ་ཆེན་རྡོ་རྗེ་གྲོ་ལོད་ཀྱི་རྒྱུན་ཁྱེར་ཕྲིན་ལས་ཀུན་འགྲུབ་ལས།    
ཤཱཀྱའི་དགེ་སློང་ལེགས་བཤད་བཟང་པོ་ངས།།   
ཤེས་རབ་ཚུལ་ཁྲིམས་གཙང་མའི་རྒྱན་འཆང་ནས༎   
བསྟན་འགྲོའི་དོན་ཆེན་བསྒྲུབ་པར་བྱ་བ་ལས༎  
སྦས་དོན་ཟབ་མོ་སྙིང་ལ་སྦ་སྙམ་ཡང་༎  
པདྨའི་བདེན་ཚིག་སྨོན་ལམ་མཐུ་བཙན་པས།།   
གསང་ཚིག་ཁ་ཤས་ངག་གི་ལམ་ནས་ཐལ༎    
ཟབ་པ་ས་གཏེར་རྒྱས་པ་དགོངས་གཏེར་གྱི༎   
ཆོས་མཛོད་དུ་མའི་བདག་པོར་གྱུར་ཟིན་ཀྱང་༎   
ཟབ་ཆོས་སྤེལ་བའི་སྣོད་ལྡན་རྙེད་དཀའ་བས༎   
སྨྲ་བ་མང་པོའི་སྤྲོས་པ་བསྐྱུང་བར་བྱ༎     
མ་འོངས་རྡོ་རྗེ་ཐོགས་མེད་རྩལ་ཞེས་པས༎    
ཆོས་འདི་བཏོན་ནས་བསྟན་འགྲོར་སྨན་པར་ཤོག།     ཅེས་ཉམས་མཚར་དུ་སྨྲས་སོ༎     ཞེས་པ་འདི་ནི་གུ་རུ་རྡོ་རྗེ་གྲོ་ལོད་ཀྱིས་བདུད་དང་དམ་སྲི་མ་ལུས་པ་བཏུལ་བའི་གནས་མཆོག་འབྲུག་སྟག་ཚང་དཔལ་ཕུག་ཏུ་ཐོན་སྐབས།     ཟབ་པ་སའི་གཏེར་ཁ་གྲོ་ལོད་བདེ་གཤེགས་ཡོངས་འདུས་ཀྱི་སྒྲུབ་སྐོར་རྒྱས་པ་ལས།     ལུས་དཀྱིལ་སྙིང་པོ་ཙམ་མཁའ་འགྲོས་བརྡ་ཡིས་བསྐུལ་བ་དོན་ཡོད་པར་བྱ་ཕྱིར་ཡི་གེར་སྤེལ་བསྟན་འགྲོའི་རྒུད་པ་མ་ལུས་པ་འཇོམས་པའི་རྒྱུར་གྱུར་ཅིག་ཅེས་གསུངས་ཤིང་།     འདིར་གསལ་བའི་གྲོ་ལོད་བདེ་གཤེགས་ཡོངས་འདུས་ཞེས་པ་ནི་བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་གཏེར་བྱོན་ཡང་གསང་ཐུགས་ཀྱི་ཐིག་ལེའི་ལོ་རྒྱུས་ལུང་གི་བྱང་བུ་ལས།    
དངོས་ཀྱི་གདུལ་བྱས་གོ་ཕྱེས་ཏེ༔    
བརྒྱུད་ནས་མ་འོངས་ལན་ཅན་དོན༔   
སྨིན་གྲོལ་བསྐྱེད་རྫོགས་གདམས་པའི་ཚུལ༔   
མང་དུ་བསྟན་ཅིང་སོ་སོར་སྦས༔    
དེ་དག་ཀུན་གྱི་སྙིང་པོའི་བཅུད༔     
རྩ་གསུམ་ཐུགས་ཀྱི་སྒྲུབ་པའི་སྐོར༔    
ཟབ་རྒྱས་ཁ་ཚང་དོན་འདྲིལ་བར༔   
འབྲོག་ཅན་ལོ་ཙཱར་བརྩེ་བས་གདམས༔    
རྒྱས་བསྡུས་སྐོར་ཚོ་བཞི་རུ་ཕྱེས༔    
རྒྱས་པ་བདེ་གཤེགས་ཡོངས་འདུས་སྐོར༔    
སྐུ་ཚབ་ཡིད་བཞིན་དཔལ་འབར་དང་༔    
མྱོང་གྲོལ་བདེ་ཆེན་རིལ་བུ་བཅས༔    
མོན་གྱི་སྟག་ཚང་དཔལ་ཕུག་གི༔    
སྒོ་གདོང་སེང་གེ་འདྲ་བའི་མགུལ༔    
རྡོ་རྗེའི་ཀེའུ་ཚང་སུལ་དུ་གཏམས༔   
འབྲིང་པོ་རིག་འཛིན་ཡོངས་འདུས་སྐོར༔   
བོད་ཁམས་བདེ་བའི་མན་ངག་དང་༔    
བདག་གི་ཕྱག་མཚན་ཐུགས་རྟེན་བཅས༔    
མཆིམས་ཀྱི་གནམ་ལྕགས་འབར་བའི་བྲག༔   
མཁར་རྔ་འདྲ་བའི་ལོགས་སུ་སྦས༔    
བསྡུས་པ་གསང་བ་ཡོངས་འདུས་སྐོར༔    
པདྨ་བཀོད་ཀྱི་ལམ་ཡིག་དང་༔   
སྦས་ཡུལ་བདེ་བའི་མན་ངག་བཅས༔   
རྒྱ་ལ་དཔལ་གྱི་རི་བོའི་འགྲམ༔    
ཕ་ཝཾ་རྟེན་སྒམ་འདྲ་བར་སྦས༔    ཞེས་གསུངས་པའི་རྒྱས་པ་བདེ་གཤེགས་ཡོངས་འདུས་ཀྱི་སྐོར་དེ་ཉིད་ཡིན་ཞིང་།     ཆོས་རྗེ་མཆོག་འདིར་ཕེབས་སྐབས་གྲོ་ལོད་བདེ་གཤེགས་ཡོངས་འདུས་ཀྱི་ཆོས་སྐོར་པོད་ཆེན་དགུའི་བདག་ཉིད་ཅན་དུ་བཞུགས་པ་གཏེར་ནས་སྤྱན་དྲངས་འོས་ཤིན་ཏུ་ཆེ་ཡང་།    ཆོས་བདག་གི་མཐུན་རྐྱེན་མ་འཛོམས་པས་བཞག་པར་གསུངས་ཤིང་།    དེའི་གཏེར་ཕུད་ཙམ་དུ་གོང་གི་གྲོ་ལོད་ཀྱི་རྒྱུན་ཁྱེར་ལུས་དཀྱིལ་ཅན་ཉུང་ངུ་འདི་ཙམ་ཞིག་གཏེར་ནས་བཞེས་པའི་བྱིན་མཐུ་ལ་བརྟེན་ནས།     དཔལ་ལྡན་འབྲུག་གི་རྒྱལ་ཁབ་ཀྱི་བསྟན་སྲིད་ལ་ལོ་བཅུ་གཉིས་ཀྱི་བར་དུ་འཕོ་འགྱུར་ཆེར་མི་འབྱུང་བའི་ཞལ་བཞེས་དང་ལུང་བསྟན་གནང་བ་བཞིན།    ལོ་བཅུ་གཉིས་ཀྱི་བར་དུ་འཕོ་འགྱུར་ཆེར་མ་བྱུང་བ་ལ།     དེའི་རྗེས་ནས་རྩ་ཁྲིམས་ཁྱབ་བསྒྲགས་དང་རྒྱལ་པོའི་སྲིད་དབང་གྲོས་ཚོགས་ཀྱིས་འཛིན་པའི་དམངས་གཙོའི་ལུགས་སུ་འཕོ་འགྱུར་བྱུང་བའི་ལོ་རྒྱུས་ངོ་མཚར་བ་ཡོད་དོ༎    
གཞན་ཡང་ཆོས་རྗེ་མཆོག་གི་གསུང་འབུམ་ཁྲོད་དུ་བཞུགས་པའི་༧གོང་ས་སྐྱབས་མགོན་ཆེན་པོ་ལ་ཕུལ་བའི་ཞུ་ཡིག་ཀུན་བཟང་དགྱེས་པའི་མཆོད་སྤྲིན་དུ་གྲགས་པ་ཡང་དགོས་པ་ཁྱད་པར་ཅན་ལ་གཟིགས་ནས་གནས་འདིར་མཛད་པ་ཡིན་ཏེ།     དེའི་མཛད་བྱང་ལས།     ཚིགས་སུ་བཅད་པ་རྒྱལ་སྲིད་སྣ་བདུན་གྱི་གྲངས་ལྡན་འདི་ནི།     གུ་རུ་རྡོ་རྗེ་གྲོ་ལོད་ཀྱིས་དྲེགས་པ་སྡེ་བརྒྱད་མ་ལུས་པ་དབང་དུ་བསྡུས་པའི་གནས་ཆེན་འབྲུག་སྤ་གྲོ་སྟག་ཚང་དུ།     ངག་དབང་བློ་གྲོས་མཚུངས་མེད་པས་སྐྱབས་མགོན་ཐམས་ཅད་མཁྱེན་པ་མཆོག་གིས་ཡང་ཡང་བསྐུལ་གནང་མཛད་པ་དོན་ཡོད་པར་བྱ་བའི་ཕྱིར་གུས་པས་ཕུལ་བ་ཞེས་གསུངས་སོ༎
དེ་ལྟར་ན་རང་རེ་རྣམས་ཡབ་མེས་རིག་འཛིན་གོང་མ་རྣམས་ཀྱི་ཞབས་ཀྱིས་བཅགས་ཤིང་བྱིན་གྱིས་བརླབས།      རྟོགས་པ་བརྙེས་ཤིང་གཏེར་བཞེས་པའི་གནས་རྣམས་སུ་མཇལ་སྐོར་དུ་འགྲོ་བ་ནི།    གནའ་ཤུལ་རྙིང་པ་ཞིག་ལ་ཡུལ་སྐོར་སྤྲོ་འཆམ་དུ་འགྲོ་བ་ཙམ་གྱི་ཆེད་མིན་པར།     པད་སྡོང་བརྩེགས་པའི་རྒྱུད་ལས།    
སྤྱི་དང་བྱེ་བྲག་གང་ལ་ཡང་༎   
གནས་དང་ཡུལ་དང་ཉེ་བའི་གནས༎   
རྒྱལ་བས་ཞབས་བཅགས་བཀྲ་ཤིས་པ༎    
ཡིད་དང་མཐུན་པ་མཆོག་ཏུ་གཅེས༎    ཞེས་དང་།     དགོངས་འདུས་ལས།    
ཕལ་བའི་གནས་སུ་ལོ་གཅིག་སྒྲུབ་པ་བས༎    
འདི་དག་རྣམས་སུ་ཞག་གཅིག་འགྲུབ་ཐག་ཉེ༎     ཞེས་སོགས་གསུངས་པ་ལྟར།    གནས་ཀྱི་གང་ཟག་བྱིན་གྱིས་རློབས་པ་དང་།   རིག་འཛིན་གོང་མ་རྣམས་ཀྱི་བྱིན་རླབས་ཐོལ་སྐྱེས་སུ་སྙིང་ལ་བབས་པ་སོགས་ཀྱི་དགོས་པ་ཡོད་པས།     གནས་ཆེན་འདི་འདྲར་སླེབས་སྐབས་སྦྱོར་དངོས་རྗེས་གསུམ་ཚང་བའི་ཟབ་ཆོས་ཀྱི་ཉམས་ལེན་ཇི་ནུས་རེ་བྱེད་པ་ཡང་ཤིན་ཏུ་གལ་ཆེ་ཞིང་།     གནས་སོ་སོར་གནས་དེ་ཉིད་དུ་རིག་འཛིན་གོང་མ་རྣམས་ཀྱིས་ལྷག་པའི་ལྷ་གང་ཞིག་དང་བསྐྱེད་རྫོགས་གང་ཞིག་ལ་བརྟེན་ནས་གྲུབ་པ་བརྙེས་པའམ།     ཡི་དམ་གྱི་ལྷ་གང་ཞིག་གི་ངོ་བོར་བཞེངས་པའི་ཆོས་དེ་ཉིད་ཉམས་སུ་བླངས་ན་དོན་བརྒྱུད་ཀྱི་རྟོགས་པ་འཕོ་བ་ལ་དམིགས་བསལ་གྱི་རྟེན་འབྲེལ་ཁྱད་པར་ཅན་ཡོད་པས།    འདིར་ཡང་རྟེན་འབྲེལ་མཚོན་བྱེད་ཙམ་དང་།     རྡོ་རྗེ་གྲོ་ལོད་ཀྱི་གནས་ཀྱི་རྗེས་འབྲེལ་དུ་དོན་གཉེར་ཅན་འགའ་རེ་ལ་ཕན་དུ་རེ་བའི་བསམ་པས།    གྲོ་ལོད་ཀྱི་མངོན་རྟོགས་ས་བཅད་མ་སྟོང་ཙམ་ཞིག་བརྗོད་ན།    
ཕྱིར་གསང་བདག་ཞལ་ལུང་སོགས་ལས་གསུངས་པ་ལྟར་ཁྲོ་བོ་ལ།     ངང་གིས་ཁྲོ་བ་དང་།   རྟོགས་པ་ངང་གིས་ཁྲོ་བ།     ཐུགས་རྗེ་ཤུགས་ཀྱིས་ཁྲོ་བ།     ཕྲིན་ལས་ཕྱག་རྒྱའི་ཁྲོ་བོ་སྟེ་བཞིར་གསུངས་པ་ལས།     འདི་ནི་གདུག་པ་འདུལ་བ་ཕྲིན་ལས་ཕྱག་རྒྱའི་ཁྲོ་བོ་སྟེ།    དེ་ཡང་རྡོ་རྗེ་གྲོ་ལོད་ཅེས་བྱ་བ་ནི།   ལེགས་སྦྱར་སྐད་དུ་ཀྲོ་དྷ་ལོ་ཀོཏྟ་ར་སྟེ་ཁྲོ་བོ་འཇིག་རྟེན་མཆོག་ཅེས་འཇིག་རྟེན་གྱི་ཁམས་ན་ཆེ་བཙན་འགྲན་ཟླ་དང་བྲལ་བའི་ཡེ་ཤེས་ཀྱི་ཁྲོ་རྒྱལ་ཆེན་པོའི་སྐུར་བསྟན་པ།     སྒྲ་ཟུར་ཆག་པས་ངེས་དོན་མདོ་སྔགས་ཟུང་འཇུག་གི་སྐུའི་ཆས་ལས་རྡོ་རྗེ་གྲོ་བོ་ལོད་དེ་ཞེས་སྦས་ཡུལ་ལམ་ཡིག་པདྨ་དཀར་པོའི་རྡོ་རྗེ་གྲོ་ལོད་ཀྱི་དབང་ཆོག་འཇམ་མགོན་ཀོང་སྤྲུལ་གྱིས་མཛད་པ་ལས་གསུངས་ཤིང་།
མོན་བོད་གཉིས་སུ་གྲོ་ལོད་ཀྱི་བསྐྱེད་རྫོགས་ཡན་ལག་དང་བཅས་པའི་སྒྲུབ་སྐོར་ཇི་ལྟར་བྱུང་བའི་ཚུལ་ནི།     གོང་དུ་གསལ་བ་ལྟར་ཁྲག་འཐུང་བདུད་འཇོམས་གླིང་པའི་གཏེར་བྱོན་ཟབ་གསང་མཁའ་འགྲོའི་སྙིང་ཐིག་གི་གྲོ་ལོད་སྒྲུབ་ཐབས་ལས།    
བདག་འདྲ་པདྨ་བདུད་འཇོམས་ངས༔    
མ་འོངས་འགྲོ་བློའི་མུན་ཁམས་སུ༔  
ཕན་བདེའི་ཉི་མ་འཆར་བའི་ཕྱིར༔    
སྟག་ཚང་བསམ་འགྲུབ་ཀེའུ་ཚང་དུ༔   
རང་གི་སྒྲུབ་པ་རང་གིས་བྱས༔   
བསྟན་པ་མི་ནུབ་དར་རྒྱས་ཕྱིར༔   
མི་འགྱུར་རྡོ་རྗེའི་གཏེར་དུ་སྦས༔     ཞེས་གསུངས་པ་ལྟར་སློབ་དཔོན་རིན་པོ་ཆེ་རྡོ་རྗེ་གྲོ་ལོད་ཀྱི་སྐུར་བཞེངས་ནས་མོན་བོད་ཀྱི་ལྷ་སྲིན་རྣམས་དམ་འོག་ཏུ་བཅུག་རྗེས།     རྡོ་རྗེ་གྲོ་ལོད་ཀྱི་སྒྲུབ་ཐབས་རྒྱས་འབྲིང་བསྡུས་གསུམ་སོགས་མཛད་ནས་གཏེར་དུ་སྦས་པ་དང་།   ཡང་ཁམས་ཀྱི་རོང་རྨེ་དཀར་མོ་སྟག་ཚང་སོགས་སྟག་ཚང་མིང་ཅན་གཞན་རྣམས་སུ་ཡང་བདུད་འདུལ་གུ་རུ་དྲག་པོའི་སྐུར་བཞེངས་ནས་སྒྲུབ་ཐབས་རྒྱས་བསྡུས་དུ་མ་མཛད་དེ་གཏེར་དུ་སྦས་པ་ལས།     སྔོན་ནས་ད་ལྟའི་བར་གུ་རུ་རྡོ་རྗེ་གྲོ་ལོད་ཀྱི་ཆོས་སྐོར་དཔག་ཏུ་མེད་པ་བཀའ་གཏེར་གཉིས་སུ་མཚམས་མ་ཆད་པར་བྱུང་བ་ཡིན་ལ།      རིན་ཆེན་གཏེར་མཛོད་གཅིག་པུའི་ནང་དུ་ཡང་།     གར་དབང་ཞིག་པོ་གླིང་པ་དང་།        འབྲི་གུང་རིན་ཆེན་ཕུན་ཚོགས།      རིག་འཛིན་འཇའ་ཚོན་སྙིང་པོ།      རིག་འཛིན་བདུད་འདུལ་རྡོ་རྗེ།       རྒྱལ་དབང་ལྔ་པ་ཆེན་པོ།     གཏེར་ཆེན་ཆོས་རྗེ་གླིང་པ།     པདྨ་བདེ་ཆེན་གླིང་པ་སོགས་ཀྱི་གཏེར་བྱོན་ཤིན་ཏུ་མང་ཞིང་།     དེར་མ་འདུས་པ་ཡང་།    ཡོངས་དགེ་མི་འགྱུར་རྡོ་རྗེ་དང་།   རྗེ་བླ་མ་གཏེར་ཆེན་རྣམ་གཉིས།   ཆོས་རྗེ་ཡིད་བཞིན་ནོར་བུ་སོགས་སྔོན་དང་ད་ལྟའི་གཏེར་སྟོན་རབ་ཏུ་མང་པོའི་གཏེར་བྱོན་བཅས་མདོར་ན་ད་བར་འཇིག་རྟེན་དུ་བྱུང་བའི་གྲོ་ལོད་ཀྱི་ཆོས་སྐོར་ཡོང་རྫོགས་ཕྱོགས་བསྒྲིགས་ཤིག་བྱས་པའི་དབང་དུ་བཏང་ན་གླང་པོས་ཁུར་བཟོད་པ་ཙམ་དུ་ཡོད་དོ༎     
མངོན་རྟོགས་དངོས་ཀྱི་སྐོར་ལ།    གཏེར་ཁ་རྣམས་ཀྱི་ནང་དུ་འགའ་རེ་གཙོ་རྐྱང་དང་འགའ་རེ་འཁོར་མཁའ་འགྲོ་སྡེ་བཞི་ཅན་དང་།    ཡང་འཁོར་དུ་བདུད་འདུལ་ཁྲོ་བཅུ་ཡབ་ཡུམ་སོགས་ཀྱིས་བསྐོར་བ།     ཕྱག་གཡས་པའི་གསེར་གྱི་རྡོ་རྗེ་རྩེ་ལྔ་པ་བསྣམས་པ་དང་རྩེ་དགུ་པ་བསྣམས་པ།    ཡང་སྤྱི་བོར་ཡེ་ཤེས་ཀྱི་ཁྱུང་ཡོད་མེད་དང་།    སྡིག་མཛུབ་ཀྱི་རྩེ་ན་ལྕགས་སྡིག་གི་ཚ་ཚ་ཡོད་མེད།    དེ་བཞིན་རིགས་ཀྱི་བདག་པོ་སྣང་བ་མཐའ་ཡས་ཅན་དང་པདྨ་རྒྱལ་པོ་ཅན་སོགས་མངོན་རྟོགས་ཕྲན་བུ་ཙམ་རེ་མི་འདྲ་བར་བྱུང་བ་ནི།   སྐབས་སོ་སོའི་དག་དྲན་གྱི་དབང་དུ་བྱས་ཏེ་དགོས་པ་ཁྱད་པར་ཅན་གྱིས་དེ་ལྟར་བྱུང་བ་ལས།    རྩ་བའི་མངོན་རྟོགས་ལ་མི་འདྲ་བ་ཆེར་མེད་པས།    སྤྱི་རིགས་ཙམ་གྱི་དབང་དུ་བྱས་ན།     རིག་འཛིན་བདུད་འདུལ་རྡོ་རྗེའི་གཏེར་བྱོན་དམ་ཆོས་སྤྲུལ་སྐུའི་སྙིང་ཐིག་གི་གྲོ་ལོད་ལས་བྱང་ནོར་བུའི་ཕྲེང་བ་ལས།   
རང་ཉིད་སྐད་ཅིག་རིག་རྩལ་དྲན་རྫོགས་སུ༔    
གནམ་ལྕགས་ལས་གྲུབ་ཕུར་བ་ཧཱུྂ་དམར་མཚན༔    
འོད་འཕྲོས་དམ་སྲི་བདུད་དཔུང་མ་ལུས་བསྒྲལ༔   
ཚུར་འདུས་གཏུམ་དྲག་རྡོ་རྗེ་གྲོ་ལོད་ནི༔    
སྐུ་མདོག་དམར་སྨུག་ཞལ་གཅིག་ཕྱག་གཉིས་པ༔    
ཕྱག་གཡས་གནམ་ལྕགས་རྡོ་རྗེ་ནམ་མཁར་ཕྱར༔    
གཡོན་པས་ཕུར་བུ་དང་བཅས་སྡིག་མཛུབ་མཛད༔    
སྡིག་མཛུབ་རྩེ་ནས་ལྕགས་སྡིག་མགོ་དགུ་པ༔   
དྲི་མ་མི་ཞིམ་དཔག་ཚད་རྒྱང་གྲགས་འཕྲོ༔     
ས་བདག་ཀླུ་གཉན་མ་ལུས་བརྒྱལ་ཞིག་འབོག༔    
སྐར་ལྟར་འཁྲུགས་ཤིང་རྒྱལ་བསེན་སྙིང་ཁྲག་འཇིབ༔    
སྤྱན་གསུམ་སྡང་མིག་བར་སྣང་ཁམས་སུ་གཟིགས༔    
ཞལ་གྱི་མཆེ་བ་རྣོ་དཀར་མན་དུ་བརྩེགས༔    
སྨྲ་ར་སྨིན་མ་དམར་སེར་མེ་ལྟར་འབར༔     
དབུ་སྐྲ་སྣུམ་པོ་ཝང་མིག་གཡས་སུ་འཁྱིལ༔     
སྐུ་སྟོད་ཟ་འོག་སྨུག་བེར་ལྷུབ་ཆེན་གསོལ༔   
སྐུ་སྨད་མཐིང་ཤམས་དམར་སྨུག་རླུང་གིས་གཡེངས༔    
བརྒྱ་ཕྱེད་ཁྲག་འཛག་མགོ་ཕྲེང་དོ་ཤལ་མཛད༔     
སྙན་གཉིས་རྒྱན་ཆ་དུང་གི་ཝང་མིག་མཛེས༔   
ཆོས་གོས་དམར་པོ་གསེར་གྱི་ཧ་རིས་གསོལ༔     
ཞབས་གཉིས་འདོར་སྟབས་འགྱིང་བག་ཅན༔    
སྟག་མོ་གྲུས་མའི་སྟེང་ན་བརྗིད་པར་འགྱིང་༔    
བདུད་དཔུང་མ་ལུས་ཟིལ་གནོན་ཅིང་༔   
ཡེ་ཤེས་མེ་དཔུང་འབར་བའི་ཀློང་དུ་བསྐྱེད༔     ཅེས་དང་།    པདྨའི་རྒྱལ་ཚབ་འཇིགས་བྲལ་ཡེ་ཤེས་རྡོ་རྗེའི་གཏེར་བྱོན་ཡང་གསང་ཐུགས་ཀྱི་ཐིག་ལེའི་གྲོ་ལོད་སྒྲུབ་པ་ལས།    
རང་ཉིད་བདུད་འཇོམས་རྡོ་རྗེ་གྲོ་ལོད་རྩལ༔   
སྐུ་མདོག་སྨུག་ནག་གར་དགུའི་ཉམས་འགྱུར་ཅན༔    
གཏུམ་དྲག་མི་བཟད་སྡང་མིག་གློག་ལྟར་འཁྱུག༔    
སྨར་སྨིན་བསྐལ་མེའི་ཚྭ་ཚྭ་འོད་དུ་འཕྲོ༔    
ཁྲོ་གཉེར་ཤངས་ནས་སྲིད་པའི་འཐོར་རླུང་འབྱིན༔    
ཨམ་གཙིགས་ཧཱུྃ་ཕེམ་ང་རོ་འབྲུག་སྟོང་ལྡིར༔    
དབུ་སྐྲ་དམར་སེར་གཡས་འཁྱིལ་དུང་ལུང་འཁྲོལ༔     
ཕྱག་གཡས་གནམ་ལྕགས་རྡོ་རྗེ་ནམ་མཁར་ཕྱར༔    
གཡོན་པས་ཕུར་བུ་བགེགས་ཀྱི་སྙིང་ལ་གཟིར༔     
སྡིག་མཛུབ་རྩེ་ནས་ལྕགས་སྡིག་ཁྲ་ཐབས་འགྱེད༔   
གསང་གོས་ཕོད་ཀ་ཆོས་གོས་སག་ལྷམ་གསོལ༔    
ཁྲག་འཛག་མགོ་ཕྲེང་དོ་ཤལ་སེ་རལ་འཕྱང་༔    
སྒྲོལ་ཡུམ་ཟ་བྱེད་སྟག་མོ་གྲུས་མ་ནི༔    
སྡེར་མོས་རྒྱལ་བསེན་སྙིང་རྩ་འདྲེན་པའི་སྟེང་༔    
གྱད་གྱི་འདོར་སྟབས་འགྱིང་ལོག་འཆམ་སྟངས་བཅས༔    
བསྐལ་མེ་འུར་འུར་འབར་བའི་ཀློང་ན་རོལ༔    
སྤྱི་བོར་མེ་ཁྱུང་སྤུ་གྲིའི་སྒྲོ་གཤོག་ཅན༔    
རྔམ་བརྗིད་འཕུར་ལྡིང་ཁྱུང་གི་ཚྭ་ཚྭ་འཕྲོ༔     
རིགས་ཀྱི་བདག་པོ་སྣང་མཐའ་ཚེ་དཔག་མེད༔  
གསང་ཡེ་ཡུམ་སྦྱོར་འཇའ་ཟེར་ཀློང་དུ་བརྗིད༔    
འཁོར་དུ་རིགས་ཀྱི་ཡུམ་བཞི་གིང་སྒོ་སྐྱོང་༔   
དཔའ་བོ་མཁའ་འགྲོ་ཆོས་སྐྱོང་སྤྲིན་ལྟར་གཏིབས༔    
ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔   ཞེས་གསུངས་པ་ལྟ་བུའོ།།   
དེ་ཡང་གུ་རུ་རྡོ་རྗེ་གྲོ་ལོད་ནི།     སངས་རྒྱས་ཐམས་ཅད་ཀྱི་གསུང་རྡོ་རྗེའི་བདག་ཉིད་ཡེ་ཤེས་ཀྱི་ཁྲོ་བོར་སྣང་བ་གསང་སྔགས་གསར་རྙིང་གི་མཁས་གྲུབ་དམ་པ་ཀུན་ལ་ཡོངས་སུ་གྲགས་པ་ལྟར་ཡིན་པས།     ལམ་འདིའི་བསྐྱེད་རྫོགས་ལ་ཞུགས་ན་ཕྱིའི་རྒྱལ་གདོན་འབྱུང་པོ་སྤྱི་དང་།   ནང་འཕྲལ་བྱུང་གི་རྐྱེན་ངན་དང་བར་ཆད་ཐམས་ཅད།     གསང་བ་ཉོན་མོངས་དུག་གསུམ་གྱི་འགེགས་ཚོགས་དང་བཅས་པ་དུས་གཅིག་ལ་གཞོམ་པ་དང་།   དུས་གསུམ་གྱི་རྒྱལ་བ་ཐམས་ཅད་ཀྱི་འབྲས་བུའི་ཆོས་མཁྱེན་བརྩེ་ནུས་གསུམ་གྱི་ཡོན་ཏན་རང་རྒྱུད་ལ་བསྐྱེད་པའི་ནུས་མཐུ་ཁྱད་དུ་འཕགས་པ་ཡིན་པས་འདི་དང་མཚུངས་པ་གཞན་མེད་ཅིང་།    ཁྱད་པར་དུས་ཞབས་ཀྱི་དམ་སྲིའི་རིགས་རྣམས་ཀྱིས་དངོས་སམ་བརྒྱུད་ནས་གླགས་མི་རྙེད་པ་ཡིན་ཏེ།     ཁྲག་འཐུང་བདུད་འཇོམས་གླིང་པའི་གཏེར་སྒྲུབ་ལས།   
འདི་ཉིད་ཉམས་སུ་ལེན་པའི་བུ༔    
པད་འབྱུང་ང་དང་གཉིས་སུ་མེད༔    
ཚེ་འདིར་གྲོལ་བ་མ་ཐོབ་ན༔     
པད་འབྱུང་བདག་གིས་དེ་བསླུས་སོ༔  
པདྨ་འབྱུང་གནས་གསང་བའི་བདག༔   
སྒྲུབ་སྡེ་བརྒྱད་དང་ཕྲིན་ལས་ལྷའི༔    
དགོངས་པ་རོ་གཅིག་རོལ་པའི་ལྷ༔    
འཆོལ་བ་རྡོ་རྗེ་གྲོ་བོ་ལོད༔    
བདེ་གཤེགས་ཡོངས་འདུས་བདག་ཉིད་ཡིན༔    ཞེས་དང་།     བདུད་འདུལ་གྲོ་ལོད་གཏེར་གཞུང་ལས།    
དབང་འདི་ལན་གཅིག་འབྲེལ་བས་ཀྱང་༔    
སྐྱེ་མེད་ཆོས་སྐུ་མ་འགྲུབ་ན༔    
པད་འབྱུང་བཀའ་ལ་བདེན་པ་འགྲུབ་རེ་རྐན༔    
འདས་ཚེ་འཇའ་འོད་ས་གཡོས་དང་༔    
གདུང་རིགས་ལྔ་དང་རིང་བསྲེལ་ཡིག་འབྲུ་ཕྱག་མཚན་ངེས་པར་འབྱུང་༔      དབང་འདི་ལན་གཅིག་འབྲེལ་ཐོབ་ན༔     གསང་སྔགས་དཀྱིལ་འཁོར་ཀུན་གྱི་དབང་རྫོགས་ངེས༔     ཞེས་དང་གཏེར་ཁ་གཞན་ལས་ཀྱང་།    
ཁྱད་པར་དམ་སྲི་རྒྱལ་འགོང་གྲི་སྲིའི་གཉེན༔    
ཁྲོ་རྒྱལ་ཀུན་གྱི་ཕྲིན་ལས་གཅིག་བསྡུས་པ༔    
མ་རུང་འཆོལ་བ་རྡོ་རྗེ་གྲོ་བོ་ལོད༔   
བྱིན་རླབས་ཚ་ཟེར་གཞན་ལས་ཁྱད་པར་འཕགས༔   
ལྷ་འདྲེ་ཚ་ངར་གནོད་པ་ཇེ་ཆེའི་དུས༔   
གཉེན་པོའི་སྟོབས་ཀྱང་ཇེ་ཆེ་ཇེ་མྱུར་འགྲོ༔    
བདེན་རྫུན་ལག་ཏུ་ལོངས་དང་གསལ་བར་འགྱུར༔    ཞེས་སོགས་གཏེར་ཁ་ཤིན་ཏུ་མང་པོ་ནས་གུ་རུ་རྡོ་རྗེ་གྲོ་ལོད་ཀྱི་བསྐྱེད་རྫོགས་ལ་ཞུགས་པའི་ཕན་ཡོན་བསམ་གྱིས་མི་ཁྱབ་པར་གསུངས་པ་རེ་ཞིག་ཡིག་ཚོགས་ཀྱིས་འཇིགས་ནས་མ་སྤྲོས་ཀྱང་།      དོན་གཉེར་ཅན་རྣམས་ཀྱི་སྒྲུབ་ཐབས་རང་རང་གི་གཏེར་འབྱུང་དང་གཞུང་ལས་ཤེས་པར་བྱའོ༎     
དེ་ལྟ་བུས་ན་རང་རེ་རྣམས་ཀྱིས་རྒྱལ་ཁམས་རིག་པས་བསྐོར་བ་གཅིག་པུ་ཙམ་མིན་པར།     སྐབས་རེ་རྒྱལ་ཁམས་སྤྱི་དང་ཁྱད་པར་རྡོ་རྗེའི་གནས་ཆེན་རྣམས་ནི་སྒྲུབ་པ་ཉམས་ལེན་གྱིས་ཀྱང་བསྐོར་དགོས་པས།    ལས་དང་སྐལ་བ་དམན་པ་རྣམས་ལ་ནི།     བཞི་བརྒྱ་པ་ལས།   
ཕལ་མོ་ཆེ་ཡི་མི་རྣམས་ནི༎  
དམ་པ་མ་ཡིན་ཕྱོགས་ཡོངས་འཛིན༎     ཞེས་དང་།     བདུལ་འདུལ་གྲོ་ལོད་གཏེར་གཞུང་ལས།     འོན་ཀྱང་དུས་ངན་སེམས་ཅན་ལས་ངན་དབང་ཆེ་བས༔      སྦྱངས་པ་སྔོན་སོང་སྐལ་ལྡན་རེ་འགའ་ཙམ་རེ་མ་གཏོགས་པ༔     འདི་ཉིད་ཉམས་སུ་ལེན་པའི་སྐྱེས་བུ་ཤིན་ཏུ་དཀའ་ཞེས་གསུངས་པ་ལྟར།    སངས་རྒྱས་ཀུན་འདུས་དང་རྩ་གསུམ་ཀུན་འདུས་ཀྱི་བསྐྱེད་རྫོགས་ཟབ་མོ་འདི་ལྟ་བུ་ཉམས་སུ་ལེན་པའི་སྐལ་བ་ཤིན་ཏུ་ཕྲ་ཡང་།     ལས་དང་སྨོན་ལམ་གྱི་མེ་ཏོག་གསང་བ་ཟབ་མོའི་དཀྱིལ་འཁོར་ལ་ཕོག་པ་རྣམས་ཀྱིས་ནི།     བསྐྱེད་རྫོགས་ཟབ་མོ་འདི་ལྟ་བའི་ལམ་ལ་བརྟེན་ཅིང་།    དེ་ཡང་ལྷ་རབ་བྱུང་ན་དཀྱིལ་འཁོར་གྱི་གླེང་གཞི་དང་མཐུན་པའི་སྒྲུབ་པའི་གནས་ཆེན་རྣམས་སུ་སྒྲུབ་པའི་རྒྱལ་མཚན་བཙུག་ཏེ།     ཡབ་མེས་གོང་མ་རྣམས་ཀྱི་གདན་ཁྲི་ཤེས་རབ་དང་མངོན་རྟོགས་ཀྱིས་ནོན་ཐུབ་པ་ཞིག་ཅིས་ཀྱང་དགོས་སོ་ཞེས་ཐལ་མོ་སྦྱར་ནས་ཞུ་བ་ལགས་སོ།།    
ཞེས་སློབ་དཔོན་སྣ་ཚོགས་གཟུགས་ཅན་གྱིས་ནུབ་ཕྱོགས་ཨ་མེ་རི་ཀའི་རྒྱལ་ཁབ་ཆེན་པོར་གནས་པའི་ཡེ་ཤེས་སྡེ་ནང་པའི་རིག་གཞུང་ཚོགས་པའི་གཙུག་ལག་ཁང་དུ།     ཕྱི་ལོ་༢༠༡༤ཟླ་༤པའི་ཚེས་༢༥ནས།    དཔལ་སྒྲུབ་པ་ཆེན་པོ་བཀའ་བརྒྱད་བདེ་གཤེགས་འདུས་པར་ཐོས་བསམ་དང་བསྙེན་མཚམས་ཀྱི་སྔ་དགོང་གི་ཐུན་བར་རྣམས་སུ་བྲིས་ཤིང་།    ཟླ་དེའི་ཚེས་༣༠ཉིན་མཇུག་ཡོངས་སུ་གྲུབ་པར་བྱས་པ་དགེ་ལེགས་འཕེལ༎

2 མཆན་བུ་འདེབ་ན་འདིར་ནོན།:

Sangye Tenzin said...
This comment has been removed by the author.
Khedrup Rinpoche said...

རིན་པོ་ཆེ་ལགས། སྟག་ཚང་མིང་ཅན་བཅུ་གསུམ་ས་གནས་གཞན་གང་དང་གང་དུ་ཡོད། མཁྱེན་ན་ཡིན་ཅིག་གསུངས་རོགས།